雅虎香港新聞 
獨角獸高達正式揭幕！高達展全面睇
上次高達嚟香港探大家已經係兩年前既事，係咪好掛住佢地呢？幸好今個夏天佢地再次登陸銅鑼灣時代廣場。就係今日全球最大聯邦軍 1:3 RX- 0 獨角獸高達(Unicorn Gundam) 、 1:3 飛翼高達 (Wing Gundam) 同一聚唔同型號既高達正式強勢回歸。小編當然第一時間帶大家朝聖啦！
RX- 0 獨角獸高達燈光 show！
今次展覽最矚目既就係迄立係時代廣場地面露天廣場既 7.5米高 1:3 RX- 0 獨角獸高達。佢不但足足用了 1年時間製作及組裝，由 8月1 至 31 日，每晚 6pm 到 10pm 隔半小時就有 4 分鐘既「獨角獸高達燈光匯演」，令你彷如置身 UC 宇宙世紀地球聯邦軍同新自護軍既戰場，見證獨角獸高達以 NT-D 模式出擊既情境！
▲ 其實今年既燈光 show，同上次差不多，都係利用大電視播放高達短片，配合高達發出既燈光而成。可能因為記招睇既時間太陽伯伯仲係度，所以燈光效果未算太突出。
1:3 飛翼高達飛入商場！
另一個焦點當然係掛係 2/F 大堂既聯邦軍 9.8米高 1:3 飛翼高達。佢係上空低飛俯瞰進入商場既遊人，偵測著敵軍既行蹤。另外，穿起太空衣 1.8米高既1:1 馬沙及其駕駛既 MSN04 沙煞比停泊係宿敵聯邦軍阿寶既 RX93 高達旁邊，靜靜等待下一步指示。
▲ 下星期小編已經親身探望過飛翼高達一次，佢既姿態竟然不變。
▲ 不過佢心口既紅紙已經拆除，4點後更加亮起了綠燈。
▲ 大家更可登上 RX93 高達既 1:1手掌上同佢合照呢！
▲ 仲可以同穿起太空衣 1.8米高既 1:1 馬沙及其駕駛既 MSN04 沙煞比合照添！
渣古 MS-06F II 頭霸氣迎賓！
巨型 3米闊既綠色渣古 MS-06F II 已經完成左係地球既首個任務，佢既頭依家放左係時代廣場鐘樓旁，亮起紅眼睛，以霸氣盡顯自護軍軍威，「自護萬歲！」
▲ 同上次小編見既有 D 唔同，渣古頭由鐘樓頂移放到鐘樓既旁邊，大家影相就更加方便。
真人比例高達近距離合照！
睇完比較大既展品，地面展覽廳就有一些近期電視動畫作品 – 《高達創戰者》中出現既角色模型。多個 2米高真人比例既高達創戰者正站立係度等大家同佢地近距離合照。
▲ 各位《高達創戰者》既粉絲們，快 D 準備好裝備同佢地一起並肩作戰！
▲ 創建爆熱高達既背後充滿火焰，十分有型。
▲ 呈半透明既火焰，形態豐富。
▲必勝高達係現場唯一一隻 Q版高達，十分可愛呢！
▲ 以「新機動戰記高達W」中登場既鳳凰飛翼高達，仍然係左右對稱呢！
▲ 因為仲未改造，仍然可以變形成飛鳥形態。
▲ 以「機動戰士高達SEED」當中登場既突擊高達改造而成既創建突擊高達，看起來有重原始既味道。
▲ 創建突擊高達背後生了一對翼。
▲ 戰國迷惘高達正揮動武士刀，準備將閃光燈斬斷。
▲ 背面好似一塊惡魔既面呢！
決戰場景任你影！
係 1:3 飛翼高達下面擺放左多個佈置成決戰場景既高達模型區，最好既就係係玻璃阻隔，想點影都得！不過記得要珍惜展品啊！
▲ 一個又一個既結果場景經典重現。
▲ 燈光同背景令模型更突出。
▲ 連羽毛都做得好飄逸。
高達機械設定師珍藏盡在眼前！
睇完影相位，係時候都展覽啦！位於鐘樓旁既地面露天廣場展出了著名日本高達機械設定師 Hajime Katoki 老師既珍藏，當中包括 Katoki 老師既手稿、機械模型等。更有由 Katoki 老師設計既全新高達造型設定 同 2米高獨角獸高達塑像。
▲RX-78-2 鋼彈亦係高達既元祖。
▲ MG 1/100 MSN-06S Sinanju 紅卜卜夠搶眼。
▲ 除左高達仲有 Mobile Pod Ball。
▲ 同場亦展出了不少 Katoki 老師既手稿。
▲ 每一件武器都設計得好仔細。
▲ 每個高達既部件都有仔細既描述。
與高達見面！
逢星期六、日仲會有 RX-78 高達、紅彗星 MS-06 II 馬沙專用紅渣古、MSN-100百式、Z 高達 同 高達聯邦軍、自護軍成員列陣出現，同大家大玩 cosplay！
▲ 大家可以同高達聯邦軍、自護軍成員形相啊！
▲ 呢度 4隻高達都係識行識走架！
▲ 另外，今日仲有「機動戰士高達UC」導演古橋一浩 同「機動戰士高達UC」著名日本男聲優內山昂輝既見面會。
▲ 古橋先生認為高達係跨越左好幾年既作品，要維持故事性係最大既挑戰。雖然最初 UC 係打算出 6集，不過考慮到故事完整性，最後出左 7集。
▲ 原來內山先生係配 UC 男主角之前並唔係高達迷，要睇番好多集之前既高達惡補呢！
限定精品排長龍都要搶！
睇完展覽，突然想砌下模型，可以去 3樓既 pop-up store 買番盒限定模型番屋企。今次更有全球限定既 HGUC RX-0 獨角獸高達 [破壞模式] Ver. GUNDAM docks at Hong Kong II、RG 飛翼高達零式 EW Ver. GUNDAM docks at Hong Kong II、MG RX-0 獨角獸高達 Ver.Ka [CODE_852]、 HGBF 熊霸 III Ver.囍 [熊雙喜]、 HGBF TRY爆熱高達 全彩色電鍍版 同 其他限定產品發售。
▲ HGBF 熊霸 III Ver.囍 [熊雙喜] $180。
▲ RX-0 獨角獸高達 [破壞模式] Ver. GUNDAM docks at Hong Kong II $175。
▲ TRY爆熱高達 全彩色電鍍版 $320
▲ RG 飛翼高達零式 EW Ver. GUNDAM docks at Hong Kong II $250。
▲ 之前你都有可能見過高達既巴士係街出現，依家你就可以帶晒成套巴士模型番屋企。
▲ 仲有 D 迷你版架添！
▲ 水杯 $120，好似有D貴。
▲ 買左唔少勝利品又唔知點帶番屋企，可以買番個會場特別版既環保袋，大既 $30，細既 $15。
• 不想錯過新科技 ? 請 Follow unwire.hk FB 專頁 http://facebook.com/unwirehk/
The post 獨角獸高達正式揭幕！高達展全面睇 appeared first on UNWIRE.HK 流動科技生活.
