【藝人也移民】王喜身在倫敦轉行做風水顧問 ？

王喜早前喺Facebook分享照片透露自己身在英國倫敦，亦不時與網民分享英國生活嘅所見所聞，而佢喺Facebook更新現況，職業竟然係喺當地做風水顧問，真係估佢唔到呀！

王喜喺個人影片頻道「隨喜遇見」拍片分享生活點滴，佢話喺倫敦足不出戶「其實都幾開心」, 不過都依然想工作，佢亦有解釋自己點解做風水顧問，原因係「希望可以用最簡單嘅方法，去解決你最燃眉之急，或者令你嘅心情比較輕鬆愉快冇咁繃緊，就算面對疫情心情都會輕鬆啲，景隨心轉，問題會容易解決，容易離開逆境﹗」。

王喜喺幾年前已經講過佢係睇書自學風水命理，更試過喺直播同大家分享風水知識。其實王喜唔係所有人都睇, 佢定咗「四不睇」包括： 一，赤道以南，唔識睇。二，北極圈以北，唔使睇。三，堅持恐龍係龍，唔想睇。四，第三者，唔L睇。而佢亦已經接到生意幫人睇屋企風水，拍咗客人嘅屋企環境又貼出一封利是，估計係對方俾嘅利是﹗ 王喜話佢最初係想做按摩師，因為能夠令人消除疲勞, 「令身邊嘅人有幾十分鐘舒服哋瞓覺、休息，係好開心嘅事，都算係一種功德﹗」不過被朋友反對，所以打消做按摩師嘅念頭﹗

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！