用交友app識到丹麥飛機師 會考24分 被外表耽誤嘅駱振偉︰我知我無觀眾緣

·2 分鐘文章

多得MIRROR ERROR,ViuTV多咗人睇,連旗下藝人都多咗人識。係人都知強尼可以唱歌講波做MC,靚模出身嘅一姐Hailey俾梁祖堯叫「八婆」叫到入晒屋。孭住音樂節目《Chill Club》又要主持又要唱嘅駱振偉(Thor),論表現論功架唔輸蝕,但係點解總係爭少少?Thor喺YAHOO TV《娛樂訪談》好坦白咁講出真相「我知我無觀眾緣」。

「我個樣唔可信」,Thor再補多句。的確,睇樣你會以為佢花弗、讀書唔成、世界仔。事實係會考24分理大畢業,簽過英皇但因為唔識同Mani打交道然後原訂嘅出碟大計被煞停,同丹麥飛機師女友透過交友app認識然後拍拖5年結婚,又真係幾唔可信。

喺娛樂圈睇落唔可信原來比唔靚更大鑊,Thor都自爆明明自己睇開足球,但係Viu播歐洲國家盃偏偏自己冇份主持。要唔要改下形象,例如帶眼鏡?「只會令人覺得你扮斯文,你虛偽,仲差咗」。

做咩都改變唔到外界印象,唔一定係Thor嘅錯,佢都知道得人信任係難能可貴。「簡單嘅人係需要保護,而我太太係個聰明但係天真嘅人……你諗下,隨便相信人係唔容易,因為我地生於一個社會,見到一樣嘢會諗『5蚊,咁平?一定係假』」,所以Thor都話外界唔應該信佢係一個好人,自己只係希望有日扶阿婆過馬路,對方唔會走開。

係喎,如果我睇電視只係想要個稱職嘅主持人,佢睇落係咪好人,有幾緊要呢?

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能