田蕊妮離巢在即 重溫佢喺無綫劇集經典角色

田蕊妮（阿田）喺06年由亞視過檔無綫後，唔少大熱嘅劇集都見到佢嘅蹤影，13年更憑《巨輪》榮升視后，登上事業高峰。噚日阿田參與錄影新春節目時，佢就宣布即將約滿離開無綫。其實佢加入無綫多年，參演過嘅劇集超過20套，當中梗係有唔少經典嘅角色，而家就同大家重溫一下啦！

好評角色：

《讀心神探》係田蕊妮過檔後首度擔任「女一」嘅劇集，佢喺劇中飾演重案組女警長「媽dam」葉展婷，除咗同林保怡飾演嘅姚學琛經常一齊查案之外，佢哋仲有感情線。睇完田蕊妮嘅演出後，唔少觀眾都覺得佢演得好好同好自然。

如果要數田蕊妮最令觀眾印象深刻嘅角色，相信唔少人都會話係《巨輪》中嘅「倀雞英」姚文英。劇中嘅「倀雞英」性格豪爽、黑白分明又有義氣，與羅威信（蕭正楠飾）白手興家創立羅信記，仲做得有聲有色。呢個角色形象討好，令到唔少觀眾對佢眼前一亮，紛紛大讚佢收放自如及演技出色。人氣急升嘅佢，更憑《巨輪》奪得「最佳女主角」和「我最喜愛電視女角色」，成為雙料視后。

《鬼同你OT》以辦公室政治作為背景，講述建築公司高層姜蓉（胡定欣飾）意外死亡，三失中女孫淑梅（田蕊妮飾）得到姜蓉鬼魂嘅幫助，順利成為公司員工，之後姜蓉一直喺佢身邊幫助她面對工作上的事宜。全劇最令觀眾印象深刻嘅一定係田蕊妮同胡定欣上演一幕「神同步」，佢哋無論動作、口形，抑或係神態都係百分百相似。呢類戲劇角色同樣難唔到阿田，演技獲得觀眾讚賞。

田蕊妮喺《迷》中飾演「 Cal姐」計穎妍，佢嘅演出簡直係由頭帶到落尾。喺劇中原本係一個好媽媽，不過因為女兒Chloe（簡淑兒飾）被錯手綁架兼慘被謀殺，踏入成魔之路，一步步展開復仇大計，陰險手段令人心寒。當中有幾幕嘅神級演出，例如去到醫院認女兒屍體、逼死林家榮（吳業坤飾）嗰幕及最後墮樓大難不死被拉入精神病院等等，每一幕都演繹得淋漓盡致，令網民一致讚好。

劇集以中年危機做主題，講述雙失中女方迎風（田蕊妮飾）面對嘅危機，同埋點樣自強不息及勇敢地重拾夢想。田蕊妮今次嘅演技同樣冇令大家失望，完美演繹自強不息嘅中女，成功令唔少女士產生共鳴。

負評角色：

雖然阿田演技係備受肯定，不過佢喺台慶劇《 來自喵喵星的妳 》嘅角色就非常之唔討好。喺劇中佢飾演來自喵喵星嘅妙妙，雖然以人類嘅身份現身，不過就保留貓既特質。唔少觀眾及網民睇完都覺得好難受，同埋話頂唔順佢扮可愛。