男友被申破產 網民嘲泊錯岸 JW講明唔想結婚

歌手王灝兒（JW）的男友葉韋彤早前遭入稟高院申請破產，一直未有回應過事件的JW昨日首度開腔護愛郎，表示與男友感情及生活一切如常，但明言暫時不想結婚，望繼續衝事業。同場的姚焯菲恨開騷，自爆與聲夢學員正籌備開音樂會。

JW、姚焯菲（Chantel）、何晉樂、文凱婷和孫漢霖昨日在荃灣出席商場騷，對於男友葉韋彤早前遭申請破產，JW大方回應事件，先感謝各界關心，但直言這是男友的家事，她不方便回應。問到男友心情如何？她笑說：「佢OK，有我喺度，我係開心果。（點樣安慰男友？）我哋所有嘢照常，我好出力工作，大家互相支持，呢樣嘢一路Keep住。（感情受影響？）唔會嘅，我哋咁多年一路以嚟互相支持，有咩事有大家喺身邊，唔需要講咁多，行動最實際。」

問到會否延遲婚期，JW直言：「咁多年我都講過唔想結婚住，想事業行先，依家又出歌又拍《痞子殿下2》，想繼續衝吓先。我哋冇結婚限期，係生BB要遲啲，不過依家咁先進，遲啲生BB都冇所謂。（等破產令解除，同男友定下4年後嘅約定？）冇諗，結唔結婚感情都一樣。」對於網民嘲笑她豪門夢碎及泊錯岸，她笑說：「我又唔係一艘船，唔係要諗住泊岸，我唔在意，我哋講心唔講金嘅。」

Chantel撐張寶兒品味

現場見JW表現風騷，更落台與粉絲玩自拍，心情似乎未受影響。她又表示不敢現場獻唱《美麗戰場》主題曲，笑言該曲很難唱，又透露本來有份客串該劇，現時日日追劇緊貼劇情，大讚陳瀅好戲，是她心目中的視后。

至於Chantel獲過百「小菲象」（粉絲暱稱）撐場，她打頭陣連唱兩首歌，唱《#BFF》時與粉絲和唱及玩自拍，場面熱鬧。她直言恨搞個人騷，又透露正籌備與聲夢學員舉行音樂會。對於早前出席活動時服飾被彈老氣，網民矛頭直指當晚的造型師張寶兒，Chantel力撐對方：「我覺得條裙好靚。（覺得套衫好成熟？）冇咁諗。」她認為每個人的觀點都不同，所以毋須太在意其他人的意見，日後仍會找張寶兒幫忙。