異搜店｜懸疑奇幻風格似《金宵大廈》？老戲骨演員陣容配首當女一陳曉華夠新鮮

TVB新劇《異搜店》已於啱啱過去嘅星期一（20日）晚上8時半首播，劇集以舊物二手店作背景，利用懸疑奇幻風格講述二手店發生嘅奇異怪事，首集播出後反應不俗，觀眾紛紛大讚題材與陳曉華做女主角夠晒新鮮。

《異搜店》由何廣沛、陳曉華、吳業坤擔大旗出任男女主角，講述二手店太子女馮祖儀（陳曉華飾）當垃圾係寶物，尤其係對臭味熏天嘅雞籠愛不釋手；之後佢發現德信（何廣沛飾）對舊物有異常感應，只要一觸碰就會喺腦海中浮現零碎畫面，透過何廣沛喺舊物牽引下，陳曉華揭開父親死亡背後真相，再一次承受痛苦。

除咗奇幻題材夠吸引，被指與《金宵大廈》相似之外，其實演員陣容亦值得一提。雖然男女主角採用拍攝經驗唔多嘅何廣沛、陳曉華、吳業坤，仲係陳曉華入行3年嚟首次擔正第一女主角，似係藉呢套劇畀一班新演員磨練演技，但就選用咗李成昌、林漪娸、曹永廉、黎燕珊、樊亦敏、陳嘉輝等老戲骨演員令成套劇加分；處男演出嘅麥秋成就喺劇中飾演二世祖，角色貪心兼心機重，對員工態度惡劣，又成日搵人孭鑊，完全放低形象包袱，不過就有觀眾表示麥秋成演繹得太斯文，而麥秋成就回應：「我都覺得可以演得再衰格啲！畢竟第一次拍劇，跟足對白，而家睇番咁衰格應該加尖酸刻薄啲碎嘴，下次會再做好啲！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！