【疫境自強】林秀怡收入大跌 打理餐廳兼洗碗照顧病母

新冠肺炎疫情持續，各行各業都受到唔同程度嘅影響，當然做藝人嘅收入都有所減少。其實唔少藝人除咗自己嘅演藝工作之外，好多都有經營副業，當中包括林秀怡（Kirby）。佢喺兩年前同閨蜜喺旺角開設日本風簡約路線嘅手工闊麵餐廳。

林秀怡除咗做餐廳嘅生招牌之外，佢仲會落手落腳打理餐廳。今日有報道指秀怡換上普通T-Shirt加cap帽，親力親為咁喺餐廳內落單及上菜。佢間餐廳喺午飯時間都算多人幫襯，不過佢就話生意額已經跌咗一半。

現年30歲嘅林秀怡加入無綫11年，2009年參加無綫電視第23期藝員訓練班畢業後就正式加入無綫，一直都係參與劇集及做主持工作。近年憑《三個女人一個因》利東伶、《是咁的，法官閣下》黄瞳、《婚姻合伙人》Ruby及《十二傳說》Mimi等多部大熱作品成功入屋，深得觀眾喜愛，成為無綫上位小花。不過早前佢多次喺社交網站為社會事件表態，疑似遭大台雪藏。雖然佢仲有一年幾先完約，不過佢就話好擔心冇人要自己，到時佢就會返餐廳洗碗。

對於人生經常有唔同挑戰嘅秀怡，父母喺佢細個時已經離異，佢就同母親一齊住天水圍公屋，母親喺秀怡事業上高峰之年亦不幸患癌。為咗佢哋日常開支之外，佢仲要努力籌醫藥費。

秀怡平日除咗係藝人身份外，放工放假時佢只係一個普通人，既知慳識儉又懂得孝順母親；平日佢會乘坐公共交通工具出入、打點自己意粉餐廳生意，亦有自行經營網店做店主主要銷售美容產品，實行一人身兼多職。