超足料又大份！7大高質抵食兩/三餸飯推介 最平$17

兩餸飯以往係唔少上班族嘅糧尾之選。最近兩餸飯店愈開愈多，間間都以大份夾抵食作招倈，幾廿蚊就可以自選2-3個餸配份量十足嘅白飯，最重要係有住家飯嘅味道呀，經濟又實惠，連藝人河國榮都出PO表示支持。

今期開飯仔精選咗港九新界嘅兩餸飯店畀大家，性價比幾高，好過自己煮。

D30(長沙灣)

$17可以買到啲咩？原來$17可以喺呢度買到個雙餸飯，真係全城至抵！而且唔好以為平嘢就無好嘢，呢度嘅食物全部由自家管理工場製作，每日分三個時段運到店舖，一定新鮮。菜式每日不一，如椒鹽豬扒、栗米斑腩、涼瓜斑腩及滷水雞中翼味道都唔錯，仲有得免費多飯，淨餸都係$22，窮人恩物呀。

價錢：兩餸$17、淨餸$22

齊記美食(屯門)

由人氣熱狗店齊柏林熱狗開設嘅副線飯店，新開無耐已經喺區內建立口碑，成日都要排隊㗎～生炒骨、蒸水蛋、辣子雞及粟米魚柳都好多人叫，生炒骨酸同甜平衡得幾好，幾開胃。辣子雞有好香花椒同麻味，雞肉都唔乾，又辣又惹味。飯都係選用泰國香米，粒粒分明。

價錢：兩餸$36、三餸$42、淨餸$40或$50

香港人兩餸飯(鰂魚涌)

家庭式經營嘅兩餸飯店，所以佢哋嘅菜式真係好有住家飯feel，絕對可以成為鰂魚涌返工朋友嘅飯堂。必點招牌生煎咸香肉餅，肉餅煎到脆脆地，充滿肉汁帶鹹香，配飯真係無得輸！香茅雞翼都一定要食，炸得香脆又唔油膩，另外仲有椰汁芋頭炆排骨、黑椒蜜糖薯仔雞翼同節瓜粉絲蝦米呢啲家常菜。

價錢：兩餸$32、三餸$40

權發小廚(油麻地、西灣河)

超人氣嘅兩餸飯店，喺西灣河同油麻地都有分店，大約18:30開始就排晒隊。選擇超多元化，受歡迎菜式包括生炒骨、黑醋骨、豉椒炒鵝腸、麻婆豆腐及話梅豬手等。黑醋骨肉質腍身味道酸酸甜甜，豉椒炒鵝腸同生炒骨都好有鑊氣同份量十足，所以話要排隊總有原因嘅。

價錢：兩餸$36、三餸$45、淨餸$45

岱民(多間分店)

連鎖兩餸飯店，雖然每間口碑同供應菜式都稍為唔同，但總體嚟講質素都唔錯，喺荃灣、觀塘、將軍澳、屯門、粉嶺、旺角、鴨脷洲、沙田、何文田等地區都有分店，方便無飯一族！推介咸魚肉餅同咖喱薯仔雞，份量一啲都無手軟呀～

價錢：兩餸$30、三餸$35、淨餸$35

廣潤(旺角)

講到份量真係無得輸，一打開個飯盒差唔多滿瀉咁濟！菜式方面炸物係最出色，好似椒鹽豬扒同炸雞翼，香脆又惹味，雖然熱氣就熱氣啲，但加返個菜就無問題喇～

價錢：兩餸$28、三餸$35、淨餸$35

玲瓏巧點功房(大埔)

每日新鮮供應二十幾款菜式，好似唔係間間都有得食嘅紅酒燴牛尾、南乳豬手、蜆肉炒春菜同欖角骨等呢度都有，而且淨係蔬菜類都有4-5款，啱晒注重健康嘅朋友。午市仲有免費例湯飲添～

價錢：兩餸$35、三餸$39、淨餸$45

文: Yanica