麥翠嫺嫁女送上3對流星錘龍鳳鈪笑稱「賺得返」 被稱3億富婆曾捲薛家燕縮水鋪事件

曾經係亞視花旦嘅麥翠嫺同老公龔汝華育有一對仔女，其大女龔敏晴Victoria星期日（20日）出嫁，63歲嘅麥翠嫺榮升外母，恭喜恭喜。

Victoria同老公Jonathan嘅人生大事，人稱3億富婆嘅麥翠嫺當然準備足料嫁妝，從一對新人向新外父新外母斟茶嘅相可見，龔汝華同麥翠嫺送上三對流星錘龍鳳鈪，家陣金價唔平，果然相當豪氣。而麥翠嫺喺Victoria婚宴見傳媒時都話，送上大份嫁妝係「必須嘅」，而且自己賺得返，好威！此外，Victoria同老公Jonathan嘅婚禮出動多架勞斯萊斯公司花車，婚禮就以多啦A夢為主題，充滿童趣幸福感。麥翠嫺喺娛圈多年，嫁女自然有唔少圈中人到賀，來賓有葉子媚、劉少君、于洋、吳大強等。

踏入人生新一頁嘅龔敏晴曾於2021年報名參加港姐，當時報稱從事金融業，面試時由爸爸開車接送，媽媽陪同見傳媒，不過最後未能入圍。

麥翠嫺係1983年亞視第一屆藝訓班畢業生，同屆同學有黃秋生、苑瓊丹等。麥翠嫺出道後受亞視重用，後來轉投TVB，到九十年代中期嫁予從商嘅龔汝華。麥翠嫺同老公龔汝華九七前後靠炒樓致富，麥因此被稱為「3億富婆」。當時麥翠嫺曾介紹薛家燕投資商場鋪位，結果商場發生「縮水鋪事件」難以出租，眾多業主血本無歸，家燕姐曾指當時因投資縮水鋪及婚變令生活相當艱難。2004年龔汝華被頒令破產，後來靠從事鐘錶生意再次致富，麥翠嫺都有幫手打理生意。前年麥翠嫺復出，喺《家族榮耀》一劇演楊茜堯媽咪。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！