范冰冰主動爭取拍馬來西亞片 導演爆范爺金句「將我糟蹋成垃圾，我奉陪到底」︳電影LOL

范冰冰一度係「范爺」，人氣勁而且咩大片都有佢份，代言多不勝數。不過因為被爆以「陰陽合約」逃稅，結果喺內地被封殺多時。冇得拍內地作品，范冰冰點會就咁坐喺度？近年佢就接拍外地製作，近期仲去到馬來西亞拍攝當地導演張吉安嘅新片《地母》，套戲亦喺早排煞科。

張吉安早幾日出post提到同范冰冰合作過程，張導話去年12月同范冰冰首次見面，當時范出席完新加坡國際電影節，再託經理人約張吉安見面。

張吉安指當時只係想認識新朋友，並冇帶作品喺身，而且自己亦未試過同「有明星光環的演員合作，我自知拍的並非什麼商業主流大電影」。見面時范冰冰話「拍電影時，即便你將我糟蹋成垃圾，我奉陪到底」，表明自己唔止係明星。

後來張吉安分享家鄉吉打故事時，談到疫情期間寫咗5個劇本，而范冰冰聽完《地母》劇本之後好感興趣，於是主動提出「這一部我很喜歡，留給我可以嗎？」。

雖則范冰冰人氣地位未及以前，但係拍新戲總會有人想知，而喺6月范冰冰已經去到馬來西亞試造型，並且喺吉打做準備。本來拍攝工作相當保密，但去到拍剩一個禮拜，范冰冰拍《地母》嘅消息傳出，於是張吉安決定臨時舉行記者會公開交代。

向來拍開大片，范冰冰拍小規模製作會唔會唔適應？張吉安話唔少行內人都想知合作成點，佢喺facebook出post指「她非常敬業，配合度極高，感性通透、演繹伸縮很強，是值得再合作的好演員」。

張吉安成長於馬來西亞吉打州，爸爸喺當地曾為人驅魔同埋做乩童，因此張導作品除咗勾勒吉打嘅風貌，亦將馬來傳統文化、民間傳說等融入其中。2020年張吉安以《南巫》喺第57屆金馬獎奪得最佳新導演及最佳原著劇本。

更多電影文章

魅笑2／完美配對謀殺案／DIDI弟弟︳電影LOL 今期睇咩戲

索女Sydney Sweeney演女版Rocky操出麒麟臂 本尊女拳王一生極傳奇︳電影LOL

《魅笑2》心寒微笑再現 導演︰將第一集嘅恐怖元素玩大10倍！︳電影LOL

港產賀歲片得返2套臨時上陣 古天樂拍城寨四子臨危受命 對撼張繼聰主演賭片︳電影LOL

小丑內閧！《劊樂小丑3》爆冷打低《小丑︰雙瘋》奪北美票房冠軍︳電影LOL

按此下載 全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！