百萬擂台戰明上演 鍾培生加碼100萬挑釁林作 邀梁榮忠任旁述

·2 分鐘文章
鍾培生林作「百萬擂台戰」明上演
鍾培生林作「百萬擂台戰」明上演

家族坐擁逾百億資產嘅「富三代」鍾培生(Derek)與林作嘅百萬擂台戰《培生擂台:無敵盃2021 WE ARE CHAMPS 2021》將於聽日(18日)喺九龍灣國際展貿中心Star Hall上演,備戰半年期間,鍾培生與林作不時互諷,鍾培生揚言林作水平同佢相差一段距離,誓要打爆林作個嘴,火花四濺引起全城哄動。

呢場「林鍾大戰」嘅門票喺7月公開發售,門票價錢由$1,280至$28,800不等,而VIP及最貴嘅VVIP門票喺售賣首日已經已經火速售罄,其後其餘嘅門票亦都全數賣完。另外,賽事可以話係星光熠熠,鍾培生日前公佈比賽將由方力申與蔡宛珊擔任主持,表演嘉賓就有樂隊Kolor與LMF,無綫體育主持何振然、拳擊教練鄧子威及梁榮忠則負責評述。梁榮忠嘅出現令網民諗起電影《破壞之王》中,梁榮忠與黃一山為周星馳拳賽擔任旁述嘅情節,網民仲希望鍾培生與林作嘅擂台戰可以出現「鍾培生嬌喘一聲倒在林作嘅懷裡」一幕,又提到如果邀請埋黃一山評述,就可以真正還原電影情節,宜家有種美中不足嘅感覺。

鍾培生之前表示自己嘅殺手鐧係好大力,有信心喺首回合打底林作,又講到唔同意林作有支持者:「今次賽事只是證明,一邊是鍾培生支持者,另一邊是鍾培生Haters,並沒有林作的支持者。那班人不是撐他和喜歡他,純粹是憎我。有些人想我贏,也有人想我被打死,但絕不是想林作贏」。鍾培生噚日(16日)仲喺社交平台再挑釁林作:「早晨,有冇興趣加碼,如果我KO咗你,扣30萬出場費,如果KO唔到畀多1,000,000你。」林作本身指自己會私下與對方詳談,但之後又再公開表示:「好呀就接受你加碼。不過100萬我唔要啦,如果你knock out唔到我,即刻同我教練李俊亨打返場,橫掂你都講過可以knock out哂全部人。」鍾培生亦喺今朝(17日)回應:「No bullshiXt let’s go,慳返300,000。」

林作 & 鍾培生
林作 & 鍾培生
鍾培生 & 林作
鍾培生 & 林作
鍾培生 & 林作
鍾培生 & 林作

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能