直播王｜前《後生仔》KOL倒戈亮相ViuTV 李寶君大住肚跳舞睇到評判一額汗

《直播王》係ViuTV首個與直播平台合作並以直播作主題嘅選秀節目，一連8個星期日晚上10時半播出，以選出「最強直播王」。節目由陳俞希（Hailey）及蔡瀚億（BabyJohn）主持，搵嚟張紋嘉（Crystal）、林奕匡（Phil）及黃慧君（花姐）擔任評判。節目喺日前已經播出第一集，唔少網民將節目焦點放喺花姐身上，仲話花姐先係主角。其實除咗花姐之外，參賽者仲有一對孖妹成功吸引網民注意，佢哋就係24歲《#後生仔傾吓偈》KOL嘅「大孖」李寶君和「細孖」李寶珊。

《直播王》評判負責喺40位參賽者當中選出12強，而喺第一集就有5位參賽者成功晉級，包括11號李寶珊和12號李寶君。「細孖」李寶珊穿上格仔短裙大騷長腿，更獲評判大讚靚女，不過佢嘅舞技就認真麻麻，睇到花姐心寒話：「我第日簽嗰啲女團係咪會係咁？我唔受得呢啲舞㗎！真係弊啦！」喺同評判見面時，細孖就話自己之前開live會諗一啲遊戲同觀眾互動，仲即場畫咗一幅畫俾評判玩「估成語」，最後細孖都獲得三盞藍燈，成功躋身12強。

之後就輪到「大孖」李寶君出場，懷有8個月身孕嘅大孖表演跳舞，雖然表現不俗但就睇到評判非常擔憂。花姐問佢有冇諗過直播生仔，佢就話有諗過直播陣痛嘅時候，而唔係生BB嗰一刻。之後花姐就直言自己心軟話之前寶君幫過佢做嘢，仲俾佢鬧到喊。寶君就話只係工作，同埋自己當時壓力太大，與花姐無關。最後大孖亦都成功晉級。

李寶君和李寶珊喺2017年加入無綫，曾喺無綫節目《#後生仔傾吓偈》中擔任過KOL主持，之後亦有為劇集《那些我愛過的人》及《智能愛人》客串，喺2019年兩姊妹齊齊離開無綫向外闖。去到今年，佢哋就一齊參加ViuTV嘅《直播王》。至於感情方面，寶君喺今年5月與拍拖多年嘅32歲DJ莊國偉（Kerry）拉埋天窗，喺參加《直播王》時已經懷有8個月身孕。寶珊嘅另一半就係孟希璘，佢哋拍拖超過兩年，上年情人節於社交網站公開同性關係，李寶珊留言話「情人節快樂，I Love You!」，愛得非常高調。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！