直播靈接觸丨梁思浩大爆圈中人演濟公犯禁近女色 58歲男星成最大嫌疑人？

由梁思浩、黃紫恩（Jojo）及黃耀英主持嘅TVB Plus（82台）互動靈異資訊綜藝直播節目《直播靈接觸》日前（17日）播出第17集，梁思浩於節目開首宣布節目決定添食多10集嘅好消息；該集請來粵劇界大前輩並有「萬能泰斗」美譽嘅阮兆輝（輝哥）擔任嘉賓，與觀眾分享粵劇界風俗、靈異事件以及演神明嘅禁忌；梁思浩亦提到曾有圈中男星因為演繹「濟公」角色期間仍接近女色而跌到冇咗影。

輝哥分享其戲班神箱嘅禁忌，指女性係唔可以坐戲班神箱：「就算男人做花旦都不能坐，而坐上去後絕對不能踢腳」；又澄清盂蘭節留一行空櫈畀「朋友仔」嘅傳聞，指第一行係畀鄉紳父老坐，而神功戲係用嚟酬神：「神保祐了你一年，我們做套戲給神看，人神共樂。仲有一個原因就是積聚鄉情，有些觀眾真的由外國回來。」對於「祭白虎」行為，輝哥解釋指，為免有新入行嘅唔知禁忌而壞咗儀式，戲班通常比入場時間早好多做「祭白虎」，以劈除邪魔妖道及求平安，而祭白虎前及點好蠟燭後都唔可以講嘢，最多只係點點頭，又指黑臉角色化咗妝之後都唔准照鏡。

輝哥續指演神明都有唔少禁忌，例如演關公嘅人除咗要齋戒沐浴及禁止近女色三日，更多數會於妝容上加粒癦：「因為你本身唔係關公，你只係扮，另外報名話自己係邊個時，通常會遮住個臉，因為你唔係嗰個人。」梁思浩亦表示台灣「跳鍾馗」習俗都有好多，例如全晚十幾個鐘都唔可以講嘢，連識佢嘅人都唔可以叫佢個名：「我估因為佢負責捉鬼，咁即係跟鬼對立，如果（鬼）知道扮嘅人係邊個就會去尋仇，當然，都係傳聞啫。」佢哋又喺節目提到內地演員游本昌曾飾演濟公十年內跟足風俗，未有觸犯禁忌，演完濟公後更短途出家以感激神明，梁思浩估計就係因為咁而令套劇大成功：「套劇有真實嘅四大奇蹟吸引好多觀眾睇，其中一個係只要濟公一撥扇、就會有漫天蝴蝶嘅效果。」梁思浩又大爆曾經有香港演員飾演濟公，但因犯禁而結果大不同：「佢無尊重個角色，經常近女色，結果真係由頂跌到冇咗影。」

對於梁思浩所講嘅香港演員身份，惹起網民熱議。而飾演過濟公嘅演員包括有周星馳、陳浩民、梁榮忠，當中網民指出最大嫌疑嘅係梁榮忠，梁榮忠於1997年TVB劇集《濟公》飾演「濟公」，但之後發展平平，加上情史豐富，曾與鍾麗淇拍拖期間多次與不同女藝人傳緋聞，又被揭與朱慧敏疑似「車震」，形象下滑之餘，近年已甚少於幕前出現。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！