雅虎香港新聞 直擊！小編私心推介 「添布頓異想世界」10件必睇作品
添布頓迷有福了，《添布頓異想世界 The World of Tim Burton》世界巡迴展覽即將登錄香港站！今個星期六開始 (11月5日) 到明年1月23日，展覽將於太古坊ArtisTree舉行。
【立即讚好】全新 Yahoo 旅遊 Facebook 專頁
Yahoo 旅遊以全新樣貌登場，Facebook 專頁當然同時煥然一新！立即讚好，每日睇盡旅遊新資訊！
鬼才大導演添布頓 (Tim Burton) 以怪奇電影見稱，由《幻海奇緣》、《怪誕城之夜》、《怪誕屍新娘》、《怪誕復活狗》到最近上映嘅《栢鳥小姐的奇童幻世界》，黑色又帶幽默嘅風格深深迷倒一眾粉絲。小編身為添布頓嘅忠實粉絲，當然要第一時間先睹為快，而家就為大家私心推介展覽10個必睇正位啦！
首先，場內嚴禁攝影或錄影，大家要打卡留念的話，記住先同入口位置嘅Balloon Boy合照啦！22呎高嘅Balloon Boy名符其實係一個充氣裝置，外型似足一個多眼燈膽，2009年由添布頓特別為紐約首次展覽製作，多年來一直擔當守門嘅重任，曾到過布拉格、巴西、東京、大板、上海等地方，極具象徵意義。另外，展覽正門亦別具特色，記住入門口前拍照留念呀！
展覽分為9個展區，展出500多件添布頓私人珍藏，必睇亮點梗係最大展區「經典電影角色 (D區)」啦，當中展出大量電影原稿、分鏡手稿同拍攝時使用嘅人偶模型。《怪誕復活狗》、《怪誕城之夜》、《朱古力掌��人》、《火星人襲地球》，仲有新加入嘅《栢鳥小姐的童幻世界》展區，假如你鍾意添布頓嘅電影，D區一定令你流連忘返，過足電影癮。
接住要介紹 「奇幻想像 (B區)」添布頓自畫像The Green Man，係1999年嫲嫲離世後創作，畫中人物神情哀傷臉上佈滿縫針痕跡 (stitch mark)，添布頓相信任何傷口都可以縫合，癒合後就可以繼續上路，Stitch mark在日後作品中經常出現。B區另一作品Blue Girl with Wine就極有怪誕屍新娘嘅影子，亦係添布頓創作中嘅女性原型。
B區仲有添布頓嘅手作怪獸模型，由筆下草稿實體化變成精緻雕塑，完全展現出一代視覺藝術大師將異想變成真實嘅非凡造藝。
「回到最初 (C區)」展出添布頓少年時代嘅作品，唔少仲係嫲嫲同老師收藏多年嘅珍品。添布頓早年作品深受日本文化影响，創作極有哥斯拉同三頭龍嘅影子。年輕就是任性，手繪畫作Mothera就將阿媽幻化成大怪獸，三頭六臂兼顧細路同家務，非常趣怪。
唔講你未必知，添布頓一生並非一帆風順，成名之前亦曾鬱鬱不得志。「為世不容的傳奇(E區)」就展出他任職迪士尼初期嘅作品，空有滿腔熱誠但全部無被採用。當中亮點係全套為小朋友創作嘅數字書，最終因畫風過於黑色未能面世，直到《怪誔城之夜》推出，迪士尼才認定添布頓嘅創作材華，成就了一代電影傳奇。
最後要介紹「寶麗萊珍藏 (G區)」，係展覽中較另類嘅作品，除了繪畫、雕塑、人偶製作，原來添布頓亦係攝影高手。G區展出添布頓用特大寶麗萊拍攝嘅原相，當中以女助手做model嘅Blue Girl系列更成為了怪誔屍新娘Sally嘅角色。另一輯將愛犬打扮成聖誕馴鹿嘅作品亦非常有趣，充份表露出添布頓對聖誕節嘅偏愛。
作為添布頓嘅忠實粉絲，能夠近距離欣賞他不同年代嘅創作實在令人心情激動！假如你有追睇添布頓嘅所有經典電影，你一定會好享受今個藝術展覽，小編強力推薦呀！不過，如果你只睇過他一兩套電影，純粹想湊湊熱鬧影相selfie，今次展覽就未必適合你啦！
最後，一齊向鬼才大導演添布頓致敬啦！
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
《添布頓異想世界》巡迴展香港站
日期：2016年11月5日－2017年1月23日
地點：香港鰂魚涌太古坊英皇道979號康和廈1樓ArtisTree
開放時間：早上10時－晚上10時
門票定價：平日$180 / 平日學生$144 / 假日$220 (不設學生門票) / 6歲以下免費 (門票分3個時段：10am－2pm / 2pm－6pm / 6pm－10pm)
售票點：Cityline (www.goo.gl/v4W18M)
