雅虎香港新聞 真正奧運精神 有些東西比獎牌還重要吧
雖然奧運選手背負住國家嘅榮辱，但係佢哋都係運動員嚟，無人比佢哋更知道一個運動員背後付出幾多先可以參加到奧運，所以更加懂得欣賞同尊重對手，更能人所不能，不斷超越自己。今屆奧運，令我哋明白到體育精神比起輸贏更重要，一齊睇吓以下5件體現奧運精神嘅賽事：
1.李慧詩與美雅絲手拖手
我哋嘅「牛下女車神」李慧詩，上屆倫敦奧運奪得女子凱林賽銅牌，呢幾年亦頻頻喺國際賽事奪得冠軍，所以今屆賽前一直被視為香港奪牌希望。不過喺今屆里約奧運以初賽首名躋身凱琳賽複賽，但喺複賽與澳洲選手美雅絲發生碰撞，令李慧詩翻車跌落地擦傷而未能繼續比賽。但事後李慧詩並沒有埋怨美雅絲，反而覺得美雅絲最後拎到牌，咁佢跌都跌得有價值，盡展大將之風。
之後兩人再喺爭先賽12強碰頭，最終李慧詩並以0.081秒擊敗對手殺入8強。但賽事結束，兩人反而手牽手繞場一周，識英雄重英雄，沒有心生怨懟，盡展體育精神，受到全場觀眾掌聲支持。
2. 女子5,000米長跑兩女將跌倒相扶到終點
美國選手Abbey D’Agostino與紐西蘭選手Nikki Hamblin喺女子5,000米預賽中，因為選手間嘅肢體碰撞，搞到兩個人一齊被推咗落地。但係Abbey D’Agostino呢個時間就伸手扶起Nikki Hamblin，仲對佢講：「起身啦，呢個係奧運，我哋必須要跑完。」令到Nikki Hamblin好感動。
之但係Abbey D’Agostino都因為跌倒而令舊患復發，唔可以即刻繼續跑，所以Nikki Hamblin即刻用簡單物理治療方式幫佢，之後兩個人先一齊繼續比賽。最後兩個人雖然包尾，但係賽後就互相擁抱。不過佢哋互相扶持，堅持完成比賽嘅精神唔單止感動觀眾，大會都破例畀佢哋晉級。雖然最終Abbey D’Agostino證實十字韌帶撕裂唔可以繼續比賽，但係佢哋得到嘅友誼比獎牌更重要。
3. 41歲體操選手為兒子籌醫藥費7戰奧運
烏茲別克體操選手Oksana Chusovitina以41歲高齡第7次出戰奧運，點解會咁？Oksana Chusovitina其實自92起參加咗兩屆奧運之後打算退役，但點知兒子突然患上白血病，所以為咗籌錢醫囝囝，惟有復出參賽，因為一塊世界賽金牌可以換到3,000歐元。佢更加為咗方便醫囝囝而入德國籍，更試過喺08北京奧運拎到跳馬銀牌。佢為咗可以參加多啲項目以拎獎牌攞多啲獎金，所以迫自己做全能型選手，保證有錢繼續治囝囝。
佢一句「兒子還未病好，我怎可以老」，感動好多人，中國前體操世界冠軍李寧甚至以「李寧基金會」嘅名義捐咗2萬歐元畀佢治囝囝。經過多年治療，囝囝病情終於穩定，只需要定期檢查，所以今次Oksana Chusovitina決定為祖國烏茲別克出征奧運，41歲嘅佢寶刀未老，唔單止挑戰被「死亡之跳」嘅Produnova跳，最後跳馬項目排名第7，連只大過佢個仔2歲嘅19歲金牌得主「黑珍珠」Simone Biles都表示非常敬佩。當Oksana Chusovitina完成賽事時更獲得全場獎聲，佢亦成為奧運史上年紀最大嘅體操選手，更係世上第一個參加7屆奧運嘅體操選手，更揚言會繼續參加下屆東京奧運，實在令人佩服。
4. 上屆馬術個人盛裝舞步銀牌得主為愛駒退出比賽
荷蘭選手Adelinde Cornelissen係上屆倫敦奧運馬術個人盛裝舞步銀牌得主，喺今屆里約奧運就比賽之前，發現愛駒Parzival發燒到40度，於是24小時陪伴住佢。 雖然到咗比賽當日Parzival體溫回復正常，但係Parzival似乎無咩心機，狀態麻麻。而荷蘭隊提出將Adelinde Cornelissen出場次序調到最後，延後一日出賽未果。最終Adelinde Cornelissen考慮到愛駒嘅身體狀況，決定退出比賽。
事後Adelinde Cornelissen喺Facebook表示，「Parzival嘅健康，比世界上嘅一切都嚟得更重要」，因為Parzival都19歲，相等於一個60歲嘅老人家，所以佢認為Parzival畢生為佢奉獻，所以唔應該再迫佢上場。雖然退出對運動員非常重要嘅奧運比賽，但係佢體諒最佳拍擋Parzival嘅表現，獲得無數網友讚揚，十分值得敬佩。
5. 帆船年紀最大選手奪金，曾患癌半邊肺切除
阿根廷帆船選手Santiago Lange與拍檔Cecilia Carranza Saroli喺里約奧運混合nacra17型帆船賽事奪得金牌，54歲嘅Santiago Lange係呢個賽事中年紀最大選手，亦暫時成為今屆奧運獲獎年紀最大選手。但原來Santiago Lange今次可以第6次出戰奧運並唔容易，因為舊年佢先發現患上肺癌，更要進行左邊肺部切除手術，切去近半邊肺。佢手術後第5日就開始投入訓練，用咗一年時間單憑右肺參加奧運，奇蹟地戰勝身體嘅缺憾奪金，驚人嘅意志力同堅持不慳嘅決心完全展現奧運嘅體育精神。
同場加映：
北韓選手奪金：金牌對我無意義
雖然好多國家嘅選手都展現出令人敬佩嘅體育精神，不過有一個國家可能永遠都只會展現愛國精神。好似呢位北韓選手李世光，雖然拎到跳馬金牌，但係拎獎嘅時候苦口苦臉，完全無展現過笑容。佢接受訪問話金牌對佢自己無咩意義，只係獻畀國家人民最大嘅禮物，而且奪金係意料中事。 佢悲情嘅樣同銀、銅牌得主嘅開心笑容實在太大對比，搞到網民都忍唔住估佢咪因為奧運結束就要返北韓，所以拎金都笑唔出。
圖片來源：網上里約奧運片段、李慧詩＠Facebook、Adelinde Cornelissen＠Facebook、Oksana Chusovitina＠Instagram、Santiago Lange＠Facebook、i-just-live＠Tumblr
