眼中風第三針

(綜合報道)(星島日報報道)五月眼中風後，吸收十分多醫療知識及健康新體驗。不過，至今未知能否藥到病除（有病人選擇唔醫），因私家眼科醫生一個療程最少四萬元，另加打針入眼，有各種風險。但，決定博一博，接受四個月三針「愛亮眼」（Eylea）眼球注射。起初，真係震過貓王，因從未試過眼球打針，單靠幻想，未入手術室已嚇到標冷汗。搞笑，打針之前，護士會逐一問病人「去咗洗手間未？」，意即：「老友，我怕你等陣嚇到瀨尿呀！」 我呢？唯有死頂，個心猛唱關正傑《大丈夫》及林子祥《真的漢子》，一唱，腎上腺素唧出，多少止到咳，冇咁驚。其實，之前老友眼科專家話：「阿碌，打入眼嘅針叫BB針，好幼，加上滴咗止痛藥水，唔會太痛，放心。」但，第一針，仍然百分百忐忑不安，正常人心理狀態呀！ 眼中風指眼球內靜脈或動脈栓塞，血過唔到，細胞冇營養壞死，又或谷出血塊，所以眼中一片朦朧，似有大嚿黑雲遮住視綫。起因通常為：一、糖尿病；二、血液高膽固醇、高三酸甘油脂等等；三、資深煙民；四、高血壓。我頭三樣都冇問題，中第四樣。上世紀九十年代開始，因長期從事高壓工作，飲食冇乜節制，導致高血壓，捱咗二十年，全個身體皆受影響，加上器官紛紛老化，當然出現這樣那樣問題，正常搏殺型香港男人，十之八九皆如此也，食得鹹魚抵得渴，無怨無悔，大丈夫一人做事一人當，唔使扮大喊十博同情，總之煮到嚟就面對，接受事實。老友，這正正就是人生，邊會風平浪靜。 好嘞，打咗兩針後，老友問：「有乜改善？」答案：「乜都冇，冇好又冇壞。」不過，既然專家聲明一個療程三針，必須捱晒佢！終於，昨日入手術室，打第三針。醫生話畀啲耐性，一個月後可能出現良性變化。到時再在此報告！ 曾智華 阿碌 開咪 專欄