神劇《大時代》十大最爆劇情

TVB重播《大時代》，唔知「丁蟹效應」仲work唔work，個市會唔會因為鄭少秋而跌，不過我地可以率先回憶下《大時代》最爆劇情，之後再慢慢追劇。(90後未睇過嘅朋友，下面有大量劇透，自己醒水！)

 掟仔落街、五蟹跳樓

《大時代》故事以倒敍方式進行，第一集一開始，就已經有丁蟹喺高樓大廈掟仔落街，方展博就慢慢數住「一隻、兩隻...」。不過，由於鏡頭令人不安遭到觀眾投訴，之後重播無綫就剪咗。唔知今次重播，有無得睇呢？

方進新哭求老闆請佢叠報紙

被丁蟹打儍同手腳失調嘅方進新，叠報紙幫補家計，不過因為手腳太慢被老細解僱，方進新跪哭求老闆再給機會佢。嗰一幕方進新講嘅對白，真係令觀眾流咗唔少眼流。

丁蟹打死方進新

正當方家過返安靜溫馨日子嘅時候，丁蟹竟然打死咗方進新。見到一個咁聰明嘅男人變傻已經好心傷，人地開始過返少少好日子就又死咗，真係睇到人好難過。

何賤去方家道歉 方展博唔領情

丁家幾兄妹喺玲姐照顧下長大，但進新死後家道中落。丁蟹阿媽何賤上方家，又跪又求，希望得到方家原諒，跟住方展博嗰段solo戲，又係令人印象深刻。劉青雲真係好勁！

孝婷戀

大壞人丁孝蟹對愛情好認真執著，不理兩家恩怨都努力追求方婷，兩個人終於相戀。可惜，方家同丁家兩家人勢不兩立，大家都估到呢個愛情唔可以開花結果。正當大家唔知點收科嘅時候，因為方婷拒絕同丁孝蟹私奔，結果丁孝蟹徹底做一個壞人，仲買兇殺埋方婷。

方敏被姦染性病跳樓身亡

丁蟹次子丁益蟹，多次強姦方家細女方敏，令方敏染上性病，最後受唔住壓力跳樓自殺。本來品學兼優嘅方敏有咁悲慘嘅遭遇，睇到觀眾戚戚然。

方家兩姐妹被掟落街

方家因為令到丁蟹坐監，丁氏兄弟買兇殺人，方芳、方婷被掟落街身亡。記得睇返艾威喺樓梯欲救無從嗰一幕。

玲姐之死

精神失常嘅玲姐想殺死丁蟹，但被警察制服時中槍，臨死前都仲周圍搵方進新送畀佢隻戒指，再加埋《容易受傷的女人》做背景音樂，場面淒涼。呢一集，得3個演員，同埋一個長州外景，咁就做出一場好戲。咁先叫神劇！

大奇蹟日

《大時代》成日同股市新聞扣連，都係因為呢幕。當年方進新幫過幾大富豪，而家佢哋出手幫方展博令大市狂升，終於喺股市贏到丁家。呢場戲，令觀眾睇到個心卜卜跳。

慳妹之死？

方展博嘅愛人慳妹（阮梅）患先天性心臟病，結局佢哋最終排除萬難喺埋一齊。劇情交代慳妹喺方展博（劉青雲飾）懷中，最後手上紅絲巾隨風飄走，但並無明確交代慳妹係咪死咗，引來懸念。