神徒上《東張西望》控訴NowTV收雙重月費 網民笑言：Anson Lo 出黎幫幫手啦

TVB資訊節目《東張西望》以社會時事及民生議題作為主打，前晚（26日）就連隔離電視台嘅問題都有幫手處理。「神徒」陳小姐喺上年年中參加「教主」Anson Lo嘅生日應援活動，期間著住NowTV收費台制服嘅銷售員指有月費優惠俾佢，不過陳小姐收帳單後，發現要俾雙重月費，蒙受金錢損失。

「神徒」陳小姐喺前晚現身《東張西望》，喺訪問中佢話自己係NowTV收費電視嘅忠實粉絲，由2012年已經開始使用，每兩年續約一次，月費由當初400多元加至最近800多元都繼續支持。而陳小姐喺上年參加「教主」Anson Lo嘅生日應援活動，期間著住NowTV收費台制服嘅銷售員Kate主動搭訕，指適逢當日係應援活動，所以有一個優惠可以俾佢，新合約優惠價只需400多元，價錢非常吸引。而陳小姐亦有指：「可能係因為嗰度嗰個氣氛比較高漲，當時其實都有少少可以話腦袋唔清晰，所以俾佢fake咗呢樣嘢。」

而陳小姐亦有向Kate提及舊合約去到2024年先到期，當時Kate就叫佢唔使擔心，佢會幫手處理新舊合約問題，仲叫陳小姐將舊解碼器喺一星期內歸還。陳小姐一心諗住順利過渡新舊合約，點知佢竟然收到兩封月結單，雙重月費下要繳付過千蚊月費。於是陳小姐即刻聯絡Kate，Kate就話會幫佢跟進，叫佢先繳付新舊合約嘅費用，多交嘅款項之後會退還。去到今年1月，陳小姐收到Kate嘅短訊指自己準備移民，陳小姐好擔心Kate唔會再幫佢繼續跟進，所以佢決定今年4月唔再交舊合約嘅費用，而電訊商就不停追數。去到8月，陳小姐仲收到電訊商委派財務公司追債嘅信，令到陳小姐相當困擾同擔心。

喺收到追債信後，陳小姐立即致電電訊公司，可惜得個拖字。於是佢再聯絡Kate，不過佢嘅答案非常官腔話搵同事聯絡佢，最後仲cut埋線添呀！陳小姐唯有再致電電訊公司，客服指事件調查緊，陳小姐可以發電郵跟進。

陳小姐之後再去報警，警方叫佢報海關，而海關就叫佢報通訊辦同消委會。而《東張西望》方面就向相關電訊公司查詢，電訊公司回覆承認有個別員工喺跟進合約過程有遺漏，指已經對涉事員工作出懲處，而相關員工亦已經離職，相關費用亦毋須支付。

節目播出後，唔少網民笑指「神徒」陳小姐唔抵幫及作反，留言：「神徒報東張」、「笑死 報東張」、「NOW TV 的擁躉, 出事後竟然找TVB幫助!」、「笑死，上東張插Now，叛徒」、「鏡粉報東張 世紀大戰」、「原來係神徒 成件事變得好合理」、「平時都打下格，今次開曬名 tvb肉酸到」、「「鏡嬸報東張笑死，又離棄同路人」」、「簽約同追星果部分幾乎完全冇關係」及「anson lo 出黎幫幫手啦」「敵台出馬即刻搞掂」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！