⚠️🇬🇧英國租樓必注意7大事項+伏位⚠️

·12 分鐘文章
《移居英國實用文系列 》租樓篇 
《移居英國實用文系列 》租樓篇

⚠️🇬🇧英國租樓必注意7大事項+伏位⚠️(按此看原文)

1️⃣租金預算 vs 日後交通開支

初到埗英國時,我揀咗喺倫敦落腳先,因為自己比較熟倫敦,不過相對嘅生活開支、租金都比其他大城市起碼貴成30-40%😢

以倫敦為例,同人sharehouse共居分租一間房月租通常叫價£600-800,studio大約£1000有交易,一房單位就再貴少少,三房單位£1500起跳,水電另計。當然個單位/房嘅地段、新舊、裝修、有冇獨立廁所(en-suite)都好影響價格,要自行衡量邊樣重要啲。

又以租一間房為例,市中心zone 1舊樓劏房可以貴過zone 3新裝修en-suite大房好多,咁其實有冇需要一定住zone 1?不過單以租金差別嚟睇,唔住zone 1住zone 3,出入嘅交通開支同時間成本可能會抵消個租金差額,長遠未必幫慳好多。可以參考返,成人zone 1 - 2月票大約£135、zone 1 - 5月票大約£230😱大家應該按實際需要咁揀地區,切勿對「市中心咩都一定比較好」呢個概念有太多迷思。現實係大部份倫敦人平日有得揀都會避免入zone 1同旅客逼。

同埋倫敦嘅租務市場其實好成熟,價格上亦反映咗好多嘢,好難有咩驚世筍盤出現……都係嗰句,便宜莫貪。

低過£600喺倫敦租一間房唔係無,但好搶手,同埋應該會遠離市中心,可能係zone2-3以外,或者唔近公共交通或其他生活配套,可能要多人共用廚廁,甚至間房冇窗(冇門嘅房我都見過),咁其實租金好多時都反映咗,網上搵樓時要留意返。

租約通常以6個月以上計,比較常見嘅係1 年約,有啲業主都接受3個月短租,甚至係Monthly Rolling月租,特別係疫情期間,因為太多人搬返鄉下同家人同住,啲Airbnb又冇人租,令市中心大量單位突然空置。我初到埗時,好好彩咁用6折價錢(約£550)喺Airbnb租到zone 1一間房,不過之後因為業主要收返個單位俾屋企人住我先搬。

另外,英國會以Furnished, Semi-Furnished同Unfurnished嚟區分個單位包唔包基本家電同設備。即使業主話包哂「必需嘅」家庭電器,但洗衣機、電視呢啲都唔一定包,租之前記得要問清楚!

2️⃣揀地區,第一步先物色心儀城市

好多人諗到要搬去英國,第一時間都係諗倫敦。咁倫敦除咗貴,其實都真係有好多好處,始終作為一個大城市,工作機會同待遇比其他城市高,學校選擇亦比較多,生活節奏同香港又貼近,剛到埗而未體驗過英國鄉郊地區生活嘅朋友應該會容易啲適應。咁倫敦其實都好大,同香港差唔多size,由倫敦西面去東面,可以成個鐘頭先到,仲未計塞車😂住得近地鐵站真係人生勝利組。

咁除咗倫敦,英國當然仲有好多大城市,例如伯明罕、利物浦、布里斯托、雪菲爾、曼徹斯特,同埋蘇格蘭嘅格拉斯哥……大家做資料搜集時都睇睇,不妨先物色心儀城市,短租半年適應期間再實地搵樓長租/買,同埋買車,咁日後要睇樓、搬屋同幫小朋友轉學校都唔洗吓吓跨城市咁辛苦。

咁揀好城市,之後點決定住邊區?比較大路嘅選擇有:

✴️市中心:英國絕大部份城市或鎮嘅中心都會有條叫High Street嘅大街,集齊所有日常生活必需店鋪,住大街附近出入交通亦非常方便。不過貴租同人多,治安比較雜啲,衛生又可能差啲。英國好多老鼠㗎,唔係嚇你,好食好住到貓咁大隻,特別係住餐廳樓上嘅單位。

✴️城市入面比較近郊嘅地區:比市中心平靜啲,住宅居多,區內有店鋪提供生活必需品,甚至會有個80年代黃大仙廣場feel嘅商場,亦有公共交通接駁市中心。你當自己住將軍澳寶琳但要日日出入中環返工咁上下,繁忙時間未必有位坐。

近年大熱嘅共居生活空間大多選址呢啲地區,仲有唔少由舊工廠改建成住宅,一個工廠單位改建成10間房咁出租,中間一大個共享空間,入面雖然冇咩裝修,但名副其實工業風,好多從事藝術或創意行業嘅年輕人會揀呢啲「共居空間」,不過衛生情況普遍差,因為10間房(通常多過10個住客)可能要共用兩個廁所加一個廚房……

至於新落成嘅多幢式住宅項目,亦大都位處呢啲地段,所以,其實非市中心都可以潛力無限。(做咩突然轉咗賣廣告tone😂)

✴️大城市附近嘅衛星城市或小鎮:可能距離市中心15-30分鐘車程。即使係小鎮,都備有基本生活配套,例如小型超市、麵包鋪、幾間餐廳同雜貨店,甚至係小型托兒所/幼稚園。租金方面,真係平好多,空氣清新啲,啲屋通常仲大啲,但要揸車出入,或依靠一個鐘先得一班嘅火車或巴士連接大城市。

不過,英國啲火車係會脫班嘅,我試過去一個小鎮見工,之後等咗3個鐘都冇火車出返城市,火車站附近間cafe個老闆娘見我呢個外人係度行嚟行去,請我飲咗杯茶,同我講welcome to our town😢😢😢😢😢

小鎮真係寧捨有人情味,係冇準時嘅火車啫。

3️⃣去邊度搵英國租盤

比較多租盤源嘅網站有Rightmove, Zoopla, SpareRoom, OnTheMarket等,甚至Facebook Marketplace同唔少Facebook地區群組入面都有好多人放盤,當中有地產經紀、業主或現任租客徵屋友。

不過我發現網上其實好多疑似由南歐人士操控嘅散仔經紀集團,大部份都話自己係資深經紀,會用靚盤相出廣告引你留聯絡,問多兩句就叫我落佢鋪頭,話要幫我制定一套完美嘅「英國搬屋規劃」,實質係想sell我佢啲垃圾盤。

我淨係想知你係咪可以有匙即睇,冇就byebye,完。

我起過幾個呢啲「經紀」個底,大多係無業遊民,靠拉客落鋪賺佣,仲專向同鄉落手,專呃佢哋人生路不熟唔知價,冇陰公囉!

Spareroom

https://www.spareroom.co.uk/

只有租盤,入面個搜尋功能好仔細,仲可以用「Buddy Up」功能出post搵人夾租,適合單身人士或年輕couple

Rightmove

https://www.rightmove.co.uk/

號稱全英國最大嘅樓盤網站,有租盤同賣盤

Zoopla

https://www.zoopla.co.uk/

租同賣盤都有,感覺上業主放賣盤較多

OnTheMarke

https://www.onthemarket.com/

同樣都係租同賣盤都有

4️⃣英國租樓一般手續同程序

上網搵到心水租盤後,約經紀/業主約睇樓時間,因疫情關係,好多人都改以視像睇樓。我建議大家冇得親身睇樓的話,都一定要求用live視像睇樓,叫佢個鏡頭即場360度轉個圈睇清間房一啲都唔過份!

確定有意承租後,經紀/業主可能要求你交一筆好細嘅金額做訂金,例如£100,藉以杜絕飛機王,又或者直接約你簽約,叫你交按金加一個月租金。

不過,一日未睇合約千析唔好俾按金!因為份約入面有好多細則或附例你要睇清楚!例如可唔可以養寵物、家居日常維修邊個負責(例如:爆屎渠邊個俾錢請師傅嚟)、屋內原有家庭電器係唔係有壞包換定要你日後埋單、提前退租罰則等。唔好睇小呢啲嘢,好多人份按金就係咁俾人扣。

業主亦會叫你提供收入證明,可以係銀行月結單、糧單、僱主推薦信等,全職學生就要交學校證明。如果啱啱嚟到未有工作,有啲業主會要求你預繳相當半年租金。作為一個雙失中女,我都俾唔少業主問過我冇收入,可以點交租。我每次都chok個自信霸氣樣答:「因為我有儲蓄。」其實我自己心入面好淆。

記住,唔好諗住睇段預錄video就當自己睇咗樓,啲片其實可以係假嘅或業主有心暪一啲缺點,我識人就係咁俾人呃咗佢租一間冇窗、由偏廳臨時改造嘅房,仲要嗰張喺段片入面睇落正常嘅床,原來現實係張凹哂嘅梳化床!佢話如果佢有親身去睇樓,佢一定唔會租。

有次我自己去睇樓,網上睇相都正正常常,明顯業主有心將間房唔好嘅嘢收埋,因為我去到先發現間房係公屋單位入面個客廳劏出嚟嘅房,連門都冇,得塊布簾做分隔,個業主仲好意思叫價£700月租……我當然黑面即走啦,但唔洗一個星期,間房已經成功租咗出去🤦🏻‍♀️

5️⃣按金一定要存入TDP

通常業主會要求租客喺簽約前先落訂同交按金,按金相當於一個月嘅租金。不過我租咁多次樓,都冇業主叫我另外落訂,大部份都係電話確認後,短時期內直接簽約,交按金同首個月租金。注意返,英國有法律規定業主唔可以收取多於五個星期租金嘅金額作為按金㗎!

由2007年4月6日起,英國亦業主必須將租客按金交到受政府認可嘅Tenancy Deposit Protection Scheme按金保障計劃,簡稱TDP。業主須於承租日起計30日內存入,並向租客提供存入證明,日後拎返按金時有咩拗撬,可以經TDP追討。

不同地區嘅TDP計劃略有不同,可參照GOV.UK網站最新名單。

英國政府認可嘅按金保障計劃:

https://www.gov.uk/tenancy-deposit-protection

6️⃣屋租以外其他雜費及市政稅

水電煤就當然要預算好啦,不同公用事務供應商會按月或季度發出繳費單,煤氣公司亦可能安裝煤氣錶喺屋內,由住客按用量(英國叫Pay-as-you-go/PAYG)咁用app/去便利店top up,好似買點數卡咁。不過我自己就鐘意搵啲包哂水電雜費嘅業主,唔洗煩呀嘛,同埋避免屋友之間嘅爭執,有睇開我page嘅朋友會明🌚

另外,英國嘅樓要交Council Tax市政稅,通常由租客承擔,金額視乎間屋嘅估值,包括面積大細、地段等因素而決定所屬Valuation Band交稅級別,由Band A 至H不等。以我住緊嘅呢個倫敦3房單位,Band D,業主一年交緊£1553.22。個banding通常都唔會變,除非你大執間屋、加建睡房或改變用途。

Council Tax級別地址搜尋器:

https://www.gov.uk/council-tax-bands

7️⃣唔好俾任何「行政費」經紀同業主

2019年6月1 起,英國已禁止經紀或業主收取任何「租屋行政費」、「背景審查費」之類嘅雜費,但我見有唔少業主都仲側側膊咁收£50-150所謂嘅「合約草擬費」又吹水話自己搵律師整合約好貴🙅‍♀️唔好玩啦,網上有哂template下載,洗_講到好似要上律師樓搵人搞,不過,有唔少租客為咗盡快簽約,又真係唔介意俾。

你可能會覺得一千幾百港紙「行政費」相比起成個移民嘅費用係好小事,但咁都反映出個業主/經紀係啲唔太老實嘅人⛔️

🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧🇬🇧

文章由Facebook專頁:好pure好true 授權刊登

Rita: 十幾年前,一個無知少女第一次旅行就去咗西伯利亞背包遊,唔經唔覺,足跡已遍車臣、格魯吉亞、科索沃、塞爾維亞、烏克蘭、摩爾多瓦、古巴、阿根廷、智利……而當年好pure好true嘅少女依家已經變成中女,繼續好pure好true咁喺英國遊歷。

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能