純粹港嘢：一個公開話只當女人係雞既男人，唔要都罷

「春嬌與志明」話成世流流長，總會愛上幾個人渣。係一段關係裡面，最渣嘅行為唔係變心、出軌、呃蝦條、養兵、而係「趙完唱」。

或者唔係每一段關係都叫做戀愛，就好係 Facebook 亦有一個關係選項叫「in a open relationship」。曖昧過，Kiss過，甚至發生過關係，現代人都可以只當對方係友達以上。即使係一齊過，但最後因為種種原因，唔想認對方做 EX 都可以被理解。但如果食完開心完之後，公開以一種高高在上嘅姿態，話「我當佢係雞咋嘛」，或者「我當佢係兵黎架咋」，真係一種好人渣嘅行為。

會好激動地有上述感慨，係因為岩岩睇完一單新聞：話說藝人吳若希小姐之前同聲稱係澳門才俊嘅Alex Ho曬甜蜜旅行照，點知另一邊廂被網友發現仲有一個女仔Toby Sin係上年聖誕，同今年情人節都係Instagram曬過Alex送嘅禮物。由於兩個女仔幾乎係同步放閃，於是就有傳言話吳若希疑似係介入Alex同Toby之間感情嘅第三者。

Alex寶寶為左箍煲，第一時間發聲明澄清話自己同吳若希一齊之前係單身，吳小姐絕對唔係第三者，佢呢種護女心切嘅行為大家都明。但好地地發一篇聲明咪夠囉，做咩要無喇喇跟多手寫多篇status 公開話淨係當Toby係雞呢？

呢篇「愛的宣言」唔睇上半段，淨係由「我應承過你要好錫你細佬」開始睇起，Alex 的確好似吳小姐話齋，係一個好好嘅男仔。但如果一個人淨係對你好，係愛你嘅時候可以為左保住呢段關係就唔理會唔會傷害到其他人，呢種人又值唔值得一齊呢？

作為一個普通食花生嘅觀眾，我地當然無資格去判斷三個人之間到底發生過咩事。但單純從Alex篇status所發表嘅言論，我會好同情Toby。首先，如果一個男仔覺得一個女仔埋佢身係為左錢，夠清高嘅可以直接話唔好，夠大方嘅唔該直接俾錢人。最小家同無品嘅莫過於只係送左花同禮物，就覺得自己係大爺咁，話送禮只係為左補償，仲單方面公開話自己由始至終只當對方係雞。如果對方真係雞，你估你自己係情聖，叫完雞放底兩支花就走得啊？

無論一段關係結局係點，分左手唔公開侮辱對方係基本人格。

當然，情到濃時愛情係盲目嘅。好多在愛中嘅人會覺得佢對我咪夠囉，最好佢淨係對我一個好就仲正。但唔好忘記，一個人嘅行為，會反映佢嘅本質同價值觀。除非你可以保證佢一生從此只愛你一人，你地唔會有機會鬧交分手反面，如果唔係，佢今日點對前度，將來就好有機會點對你。

比起樣貌、財富同智商，選擇另一半時，更重要嘅係睇抗清楚對方人品。至少我是這麼認為的。

純粹思考題：如果一個異性好有錢，對你好，但對其他人，例如前度，朋友，服務員都極度無品，你會選擇要定唔要？

TEXT / Diana CHIU

相片來源：

nextplus.nextmedia.com

hk.news.yahoo.com