雅虎香港新聞 純粹港嘢：如何避免呃錯蝦條一世困擾
作為一個旁觀食花生既觀眾，我覺得Oscar Ma（下簡稱OM）作為一個教通識既補習名師，係公關處理上真係衰到無朋友。睇返事件之初，女事主係高登發表既《[真人真事]我和補習老師上床了(長文慎)》其實係冇開名的，純粹可能受左情傷唔開心豬想發洩下，奈何就算事主表明：「希望知道他是誰的人不要公開他出來，不知道的，也不要八卦了，只要他的學生知道我在說誰，小心提防就好了。」但呢個世界係無野暪得過高登，據聞未夠50個回應，就已經有高人推斷到食家應該係OM。但當時一切都仲係傳聞階段，未有證據蒲頭。
如果OM醒少少，或者唔好懶醒，識得係呢個時候私下搵個女仔道歉又好，求和又好點都好，總之令個女仔個心舒服D，相信對方係明顯仲鐘意佢既情況下，未必會選擇一拍兩散，公開哂所有對話cap圖去證明自己冇抹黑。
奈何識得通食，但通識水準明顯未夠班既OM選擇左自毀三步曲：死到臨頭唔認數，聲大夾惡搵律師，偽造證據43.5KB。就呢三步自作孽不可活黎講，佢係抵死既。但如果單純地回歸返「食女」呢件事黎講，我反而幾同情Oscar Ma。
有人話，出得黎呃蝦條，就預左比人____。但細心D睇返OM同少女既對話，會發現其實男方由始至終都冇比過任何承諾，亦無叫過個女仔做佢女朋友。心水清既女仔，應該會發現佢明顯只係想食好西。你鐘意得佢，肯未確認關系就願意發生關系，其實預左對方食完未必肯賣單。結左婚可以離，拍左拖都可以散，食完好西發現唔岩口味，的確有權選擇唔一齊。
如果時光可以倒流，我諗OM會寧願比錢叫雞，最少明碼實價，一買一賣，大家各取所需完唔會有尾數要找。所有因為一個「情」字暫時免費比你拎到既著數，例如人情同愛情，背後永遠暗藏一個唔知幾時要還，同點樣去還既代價。
女都係一樣，免費食到既女一定有代價。
一夜情時你情我願，但完事後個女仔突然諗唔通告人強奸既新聞應該大家都睇過。
而面對佢鐘意你，同你講心唔講金的女仔，佢要既就係名份，你可以唔比錢佢，但要比愛比關心同比時間佢。OM既學生妹明顯就係呢隻，佢鐘意你，食到你可能自己都爽左，但佢覺得你要付既責任係做佢男朋友。你比唔到佢既話，就算大家係你情我願，無話邊個食邊個，佢都會覺得自己洩底左，處理不當，加上你本身係靠個名搵食，就好易好似OM咁，最後被唱到身敗名裂。
如果你有錢人又想搵D唔上身既，呢個社會仲有一種選擇叫契女。契女通常好清楚自己要D咩，只要你比到佢認為足夠既金錢，佢就願意付出相應既青春同時間。但因為女性係感性既動物，好容易上完身就動埋心。
所以想提醒下一眾巴打，如果遇到一個女仔，你想齋食唔上身，記得留意對方有冇下列特徵，如果有就最好及時抽身，回頭是岸：
1． 無間斷地wtsapp你，未等到你覆，佢就已經忍唔住不斷問你係邊，做緊咩，點解唔理佢。呢個係痴身既前奏。
2． 成日係Facebook發表傷春悲秋無人愛我感情不順求呵護文。證明個女仔需要愛情，將愛情睇得好重，係容易認真的女人。
3． 明明未一齊，仲曖昧緊，但係已經 send嘔心瀝血千字文比你。如果你已經同呢個女仔發生關系，請千其唔好輕視呢篇文，因為呢封好可能已經係 warning letter，如果你唔及時處理左佢，就有機會變下一個OM事件。
最後提提大家，男女都好，如果一開始就抱住玩玩下心態又唔想最後賴野，可以打電話既就唔好咁懶用msg喇。
純粹思考題：成日話男女平等，點解你情我願做完愛，女人最後選擇唔拍拖就得，男人決定唔一齊就要比人鬧爆呃蝦條？
text / Diana CHIU
