索媽倒模梁婉靜17歲女仙氣出巡

東方新地 - 娛聞

更新日期： 2018年7月7日上午3:25

無綫最近在深宵重播的《刑事偵緝檔案》系列至5輯，令唔少劇迷回憶返晒嚟，除了陶大宇郭可盈演的「大勇、Jessie」掀起熱潮，劇中演女同性戀者的梁婉靜，當年一樣令人印象深刻;現年52歲的梁婉靜，自98年嫁李澤楷頭馬、盈大地產行政總裁李智康後，便淡出娛樂圈相夫教女，眨吓眼，女兒已經17歲，長得亭亭玉立，日前兩母女姊妹花出巡，女兒一頭長直秀髮加42吋長腿，更如倒模媽咪全盛時期靚樣，條件出眾索過唔少大台小花，絕對係矚目星二代。

撰文：東方新地｜圖片：新傳媒圖片

梁婉靜退出20年

除了有香蕉船姐姐稱號，梁婉靜亦拍過唔少無綫劇集，《壹號皇庭》系列、《刑事偵緝檔案3》及《妙手仁心》等，即使未演過女一，但出道時的身形高䠷，有一頭烏黑長髮加秀氣靚樣，令梁婉靜好快入晒屋，被封「長腿女神」。不過，梁婉靜98年演完《妙手仁心》就淡出娛樂圈嫁人做少奶奶，老公更大有來頭，是電盈小小超李澤楷頭馬、盈大地產CEO，年薪過千萬。

據知情人士透露，梁婉靜結婚之後，同老公都非常低調，好少同圈中朋友聯絡，完全唔眷戀以前在娛樂圈嘅風光，反而好享受過普通人嘅生活。「雖然老公咁富貴，但梁婉靜平日打扮都好樸素，好多時一條One Piece裙就出街，打扮簡單隨意，唔會下下晒成身名牌，不過就算佢冇做呢行咁耐，依家行出嚟都仲好有氣質！」

手持億半物業

老公是上市公司總裁，梁婉靜婦隨夫貴，買賣過唔少物業，跟老公共同持有貝沙灣單位，華富道富臨軒單位，以及沙田嶺路戈林獨立屋，加埋個人持有的銅鑼灣寶明大廈單位，手上物業市值超過1億半，身家極豐厚！

不過梁婉靜多年來一家十分低調，日前被拍到同17歲索女兒姊妹花行街，都打扮樸素充滿活力，梁婉靜更全程翹實女兒一齊行，兩母女感情要好，遺傳了媽咪美人基因兼擁有42吋長腿的囡囡，離遠睇已經非常有仙氣，似足梁婉靜當年氣質女神風範，雖然身家億億聲，但兩母女食嘢相當簡單，只係買外賣醫肚，路過寵物店就一齊入去睇寵物，不過見舖頭愈嚟愈多人，梁婉靜就好有耐性企到外邊等女兒，對女兒呵護備至；雖然家中索女初長成，更經常被讚有條件入行，不過，梁婉靜就貫徹低調作風，早前受訪就坦然想女兒過平凡人生活，似無意畀女兒入行。

母女勁Sweet

幸福闊太

一家三口出巡

女神變低調闊太

梁婉靜最為人熟悉的演出作品，可算是《壹號皇庭》系列，當中她先後在《壹號皇庭II》及《壹號皇庭IV》中先後扮演湯芷珊及湯芷琪一對孖生姊妹，演陶大宇女友。

成為李太的梁婉靜，完全洗盡鉛華過平凡人生活，就算去年底一班演員約埋飯局敍舊，都未見梁的蹤影！

仲有一班索爆星二代⋯⋯

龔慈恩女林愷鈴美腿吸睛

近年一眾明星的後裔備受關注，其中龔慈恩女兒林愷鈴 (Ashley) 今年只係18歲，身高1.73米，五官標緻身材均勻更有一對修長美腿，影相拍照有台型更有仙氣！

得媽媽指點後識打扮識影相，更對自己外型愈來愈有信心，Ashley社交網終有大量高質仙氣靚相，比起當年在電視圈以氣質取勝的龔慈恩餅印得嚟更加青出於藍。

任達華琦琦囡囡有43吋長腿

話說任達華同琦琦個獨女任晴佳今個母親節處女登場擔任首飾品牌模特兒，仲跟住媽咪一齊去到鋪頭揀母親節禮物。13歲女身高已經超過5呎7吋，眼大鼻高、樣子甜美，隨意一身白T、熱褲平底鞋，又pure又true。五官完全集合父母優良DNA，不過一對又直又長的43吋長腿，更加搶晒鏡！

任達華囡囡 — 第一次做品牌model的任晴佳日前同埋媽咪去首飾店揀母親節禮物，13歲女生得牛高馬大，內裡仲係乖巧小女孩，坐在琦琦大腿撒嬌。

今次就話係客串玩票性質做一次暑期工model，其實天生咁嘅條件又有影帝爸爸同超模媽媽教路，唔行天橋唔做幕前，真係好浪費，華哥講到明代女推咗唔少job，當中仲包括有真人騷㖭，中港台都𥄫住呢位長腿星二代，雖然親手推咗唔少錢走，不過華哥話一啲都唔會手軟，全因為囡囡仲細，暫時唔考慮住咁話呀！大家死咗條心等多幾年先啦！