終極兩難 如何解決同事口臭問題

先旨聲明，講緊嘅係真係口腔有異味嘅「口臭」，唔係講嘢唔經大腦成日得罪人嘅「口臭」呀。好多人都話，同事幾乎係家人之外最常見面嘅人，甚至有人見同事多過見自己伴侶及家人。世衛就估計全球有數千萬人有口臭問題，原因眾多，例如口腔衛生問題、腸胃問題、牙齒問題等，都唔多述。口臭呢個問題最尷尬係大部分人係唔會聞到自己有口臭，必須靠其他人直接話畀自己知。如果同事有口臭，兩難局面就嚟，究竟直接話畀佢知？定詐唔知呢？

創立外國著名辦公室討論區Techworks嘅創辦人Susan Sherwood就曾經教路，表示直接話人有口臭可以算係「人身攻擊」，仲要係屬於重量級攻擊，相信無人唔會有Hard Feeling。佢就建議咗以下幾點，應對唔同嘅情況，大家不妨考慮考慮。

一定唔好講

屬於呢個級別嘅，包括你嘅老細或任何比你高級嘅同事，除非你覺得你同佢係「知心好友」，否則請勿話佢知，明示暗示都唔好，就算你扮作真心關心，一樣係令對方難受，千萬唔好玩命！另一類唔好講嘅就係平日完全唔會合作嘅同事，甚至連點頭打招呼都未必會，無謂多作好心。

間接地講

最常接觸嘅同事，萬一對方突然有口臭，最好嘅做法係自己拎包香口膠出嚟，自己食完再請對方食，通常對方都會明白你一番好意，會心存感激。另外如果對方唔係同你好常接觸嘅同事，為對方好的話不妨跟佢嘅同Team同事提醒一聲，等佢哋幫下手。

直接講

幾乎無，除非你同佢係識咗十年以上嘅好朋友。

Susan Sherwood其實都講得好清楚，職場唔同家庭，好多事就算為對方好，都唔需要直接講出口，要諗一諗對方嘅感受同埋聽到後嘅反應。更多時候其實不如收埋，無須刻意開口，畢竟好多時就算你出咗聲，問題都唔可以突然解決。