結婚一周年補擺酒 鄭俊弘怨何雁詩奄尖 夫妻劃界

·3 分鐘文章
鄭俊弘與何雁詩如常放閃,啜到唔願分開。
鄭俊弘與何雁詩如常放閃,啜到唔願分開。

歌手鄭俊弘與何雁詩趁結婚一周年補擺婚宴,一對新人表示將展開造人大計。鄭俊弘大爆老婆奄尖,為保婚姻美滿,拒讓對方擔任其歌曲製作人,明言在音樂事業上兩夫妻不接觸為妙!

昨日是鄭俊弘(Fred)與太太何雁詩(Stephanie)結婚一周年紀念,他們特別揀選這一天在酒店補擺婚宴兼慶祝,筵開38席宴請親友,不少圈中好友到賀,相當熱鬧。一對新人在姊妹團蔡思貝、Cheronna、賴慰玲、羅天宇及張子丰陪同下,於婚宴前會見傳媒,並應要求大方錫錫。

Stephanie穿超低胸婚紗晒「湯碗胸」,Fred笑言不介意另一半性感騷Quali,更大爆老婆準備了另一襲同樣性感的紅色晚裝,他笑說:「依家開放咗,嗰套都拍得住呢套!」對於盛傳雙喜臨門,Stephanie笑說:「梗係唔係啦!多謝大家關心,暫時呢個階段都唔係。」問到造人大計,她指順其自然,又笑說:「睇老公表現!(造人)幾時都得,唔使特登請假。(計定日子?)未去到咁深入,隨緣。」

蔡思貝為胡鴻鈞伴舞

一對新人笑指婚宴十足演唱會,現場設有Live Band,不少朋友爭住上台唱歌,包括胡鴻鈞(Hubert)、吳業坤及譚嘉儀等,作為主人家的他們亦會上台演唱,敬酒後更設點唱環節。提到去年林盛斌(Bob)在派對飲醉爆粗贈興,Stephanie笑說:「好想阿Bob上台唱,好期待,佢行唔到路都要唱!」

Fred最近忙於拍攝新劇《法證先鋒V》,透露只向劇組請了2日假,明日就要重投劇組開工。而簽了新經理人的Stephanie指結婚用了不少錢,要努力搵錢,笑言之後會幫老公錄音,豈料Fred卻耍手擰頭:「唔會!唯一維持到我哋婚姻嘅,就係唔好喺工作上合作,因為佢都幾奄尖,甩一粒音都會嘈,避免大家有衝突,暫時喺工作上唔好接觸住!」

擔任姊妹團的蔡思貝指「SIXTERS」成員陳瀅由加拿大返港,由於正在隔離,所以未有到賀。提到「男友」Hubert會上台獻唱,她笑說:「我負責伴舞!(你頂酒?)我都唔飲得!見證咗Step兩次『結婚』,都學識做個Wedding Planner,但因為開緊劇,所以今次冇咩幫到手。」

陳嘉寶下月生得

而Hubert與Stephanie由《超級巨聲》已相識,至今有10個年頭,開心見證對方步入人生新階段,更期望她早日生B,又笑說:「入行以嚟第一次唔收錢唱歌,同佢哋識咗好耐,唔講錢,但我同一對新人講明:『下次結婚唔好再請我!』」對於思貝表示可為他伴舞,他說:「吓!咁真係要收番錢喎,收番何雁詩錢先得,安撫番我個心靈,咁驚嚇!(唔開心咩?點解驚嚇?)因為今日好多高層、監製都喺度,陣間表演我要嚴陣以待,好似做嘢咁樣,唔使畀呢個驚喜我喎!(你好似抗拒思貝?)唔係,我只係抗拒唔知嘅情況啫!(咁講唔驚佢嬲?)唔驚!佢邊有咁小器?」

至於腹大便便的陳嘉寶偕老公現身,其手腳仍然纖瘦,她透露預產期是12月,並將舉行Baby Shower揭曉第3胎性別。她大讚Stephanie成熟不少,比起老公更照顧得她無微不至,不過為了讓一對新人享受二人世界,暫無意傳授生B秘笈。

何雁詩的Deep V婚紗超性感,難得老公不介意。
何雁詩的Deep V婚紗超性感,難得老公不介意。
一對新人與兄弟姊妹團在花海襯托下合照。
一對新人與兄弟姊妹團在花海襯托下合照。



我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能