總導演「投訴」太百厭 Chantel哼歌捱鬧

「聲夢幫」聚埋即時七嘴八舌,難怪會被投訴。
「聲夢幫」聚埋即時七嘴八舌,難怪會被投訴。

「聲夢幫」炎明熹及姚焯菲(Chantel)等前晚為孭飛的無綫新劇造勢,大談拍攝時的難忘事。除了喊戲成為賣點,Chantel更自爆等埋位時掛住唱歌,結果被幕後同事開聲叫「肅靜」,認真尷尬!

炎明熹(Gigi)、Chantel、詹天文及冼靖峰(Archie)等前晚出席校園歌舞劇《青春本我》宣傳活動,席上首播劇集歌曲《快啲快啲》MV,吸引大批粉絲逼爆商場。

Gigi與Chantel同聲表示只在拍攝時看過重播片段,未看過製成品,所以很期待劇集播映,Chantel最難忘劇中的喊戲:「好想睇呢場喊戲,係真眼淚嚟,所以好期待!」Gigi笑指當日2人都有喊戲,大讚對方一見公仔就喊得出,反觀自己拍首Take時因情緒未到而哭不出來,後來才慢慢進入角色,淚功亦有所進步,收放自如。

Archie臨場「爆肚」

提到總導演大爆一班學員拍攝時的頑皮事,Chantel自爆嘈到捱罵:「唔使拍攝嘅時候,我哋掛住唱歌、哼歌,因為現場收音,結果畀人鬧,叫我哋靜啲!」問到Gigi可有被罵?她笑說:「好似冇,因為我冇乜出聲,但係所謂嘅鬧都係錫我哋嘅語氣,唔係好嬲嗰種。」對於近日有網民把她參加《聲夢傳奇》前的中間分界造型上載至網上,獲讚有「仙氣」,Gigi對此有點愕然:「竟然?我冇仙氣,只得魔氣!嗰陣應該係參加比賽前、音樂學校嘅Live表演。」

至於Archie透露劇中與何晉樂有「親密行為」,笑言拍攝時有「爆肚」加對白:「玩吓玩吓咁,可能我哋好Friend有化學作用,導演都話好,希望大家鍾意。」又指對劇集主題曲歌詞印象深刻:「歌詞第一句『We have it all』,原本係『We had it all』,後來改咗,首歌係講現在所擁有。音樂總監話20年後,我哋再唱已經變成共同回憶,首歌依家聽未有靈魂,可能過5年、10年、20年時會喊住唱。」

Gigi向粉絲派發宣傳品,個個爭住要!
Gigi向粉絲派發宣傳品,個個爭住要!
Archie(左)與張馳豪派薯片。
Archie(左)與張馳豪派薯片。