羅淑佩果然係Hellosss 現身馬場追星甜笑冧爆 Ian陳卓賢：畀啲空間佢

早前升職至房屋局常任秘書長兼房屋署署長嘅羅淑佩，喺7月時自爆除咗係「鏡粉」之外，仲話自己係「Hellosss」（Ian陳卓賢粉絲專稱）。羅淑佩繼早前趁公餘時間前往機場含情脈脈緊隨Ian拍攝節目後，喺今日佢再到沙田馬場支持Ian，佢果然係忠實嘅「Hellosss」呀！

今日（15日）係馬會年度盛事「時尚煲呔賽馬日」，活動邀請ViuTV人氣男團MIRROR成員Ian擔任活動開幕表演嘉賓，活動成功吸引一大班「Hellosss」入場支持偶像。Ian以西裝配煲呔打扮，官仔骨骨登場，獻唱《正式開始》、《抱抱無尾熊》及《留一天與你喘息》，成功俘虜在場粉絲。喺Ian獻唱期間，有記者發現羅淑佩都有到場支持，署長全程春風滿面，非常投入咁全程跟住Ian唱歌，睇嚟心情相當之唔錯。

Ian喺活動完結後接受傳媒訪問，期間佢好多謝署長支持，表示好開心再一次見到署長，仲話有一次署長做訪問話好欣賞佢，連Ian媽媽都感到自豪，因為聽電台聽到署長讚佢叻仔，之後媽媽都有讚佢叻仔，佢媽媽好少讚佢。之後被問到有冇同署長打招呼，Ian就話有打招呼同好多謝佢嘅支持，不過好希望大家可以俾空間署長，因為佢都係喺公餘時間做一啲令到自己可以放鬆同享受嘅事情。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！