美麗40路︳黃智雯現身ViuTV做決賽評判 網民︰佢靚過參賽者

TVB花旦黃智雯去年底離巢TVB，並轉投凱藝娛樂，成為朱茵、蔡少芬嘅同門師妹。最新消息指，黃智雯將於下周日（29日）現身ViuTV，為綜藝節目《美麗40路》擔任評判。

據知，當晚評判陣容除咗黃智雯之外，仲有方皓玟、《全民造星5》冠軍香胤宅以及ViuTV高層及贊助商代表。網民得知黃智雯會做《美麗40路》評判後都話期待，認為41歲嘅Mandy夠晒資格，甚至靚過啲參賽者！

黃智雯年初「脫無」之後，同拍拖多年嘅男友拉埋天窗。相比過去一年幾套劇出街，Mandy而家曝光率少過以前，主要喺社交平台拍片分享生活。

今次現身ViuTV，令黃智雯「疑似鏡粉」嘅話題再炒熱。舊年Mandy為TVB遊戲節目《思家大戰》做嘉賓，佢個名牌唔係寫自己個名，而係Hellosss，亦即係MIRROR成員陳卓賢Ian嘅fans稱呼。而更早之前，仍然身在TVB嘅黃智雯被問到會唔會睇MIRROR演唱會，佢居然冇落閘，只係話到時要開劇，但有機會都想入場。唔知遲下Mandy會唔會有機會再去ViuTV開工，甚至同鏡仔合作？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！