美麗40路｜前ViuTV一姐黃心美主持被狠批退步兼扮大家姐 網民激讚劉明軒

ViuTV選美節目《美麗40路》由孫慧雪、陳俞希、劉明軒及黃心美主持，參賽者係一班35+嘅女性，除咗素人，亦有KOL、演員、歌手等等，15強已閃耀誕生，而總決賽將於9月29日播出。除咗參賽者成為亮點，基於節目係黃心美回巢後首個工作，網民對此大感期待；不過，黃心美表現似乎未如過往理想，被網民於社交平台發文狠批，甚至指另外三位主持表現更佳。

黃心美曾於Now TV及ViuTV擔任主持，更有「ViuTV一姐」之稱。2017年，黃心美被驗出甲狀腺指數高企，需要戒口及定期檢查，醫生甚至勸佢轉行減少壓力。不過，黃心美於2018年11月選擇離巢ViuTV，以自由身藝人身份工作。黃心美坦承離開ViuTV後曾有長達8個月無工作嘅冰河期，之後先開始返主持工作，包括為HOY TV《男士堂》擔任主持及以特別嘉賓身份拍攝J2台《超級毛特兒大賽》。黃心美是次回巢ViuTV主持《美麗40路》被網民於社交平台出PO指表現大不如前，更狠批佢唔啱ViuTV而家個後生創新感覺：「睇Viu個美麗40路，覺得黃心美真係好唔夾依家Viu個vibe～佢果副一臉正經講野無表情同埋無尾音好odd… 雖然佢係曾經係開台時嘅一姐…但走咗咁耐，個台都已定性為後生創新嘅台～佢用呢種一臉正經嘅tone真係好唔岩做Viu嘅綜藝～」唔少網民都表示同意：「好似冇乜精神」、「佢好似想扮大家姐咁」、「佢苦口苦面」、「記者會佢擺明想搶返一姐，現一姐講野，佢下下串人，同埋好無禮貌」、「個feel好寸」、「同感！有一集佢突然有啲惡咁對參賽者，明明啲參賽者同其他主持都好chill，唔知做乜咁勞氣又成日黑口黑面」、「佢一開口，就令氣氛好凝重，沉重」等等。

網民反而對孫慧雪、陳俞希、劉明軒呢三位主持表現感驚喜，認為佢哋比黃心美主持得更好：「池中無魚，Vivian響有線經驗比佢多，人又靚，佢真係節省少少」、「其餘果3個好輕鬆活潑，主持得好好」、「估唔到劉明軒年紀最大反而同後生過佢嘅主持夾得幾好」、「反而雪雪比想像中好」等等，網民仲話覺得劉明軒講嘢恰到好處，聲音個tone都好舒服，而孫慧雪就對參賽者幾好，有一齊參加既感覺。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！