老字號新雄雞舊址新開心機麵包店 創新拉絲菠蘿包 + 重口味芫荽蒜蓉包

相信牛頭角街坊對「新雄雞」呢間老字號一定唔會陌生，食咗咁多年佢哋嘅爐底麥、沙翁等，自佢哋年頭結業後都冇機會再食到。不過，有好消息要話畀大家聽！老店原址開咗間新嘅麵包店，仲特意請返新雄雞第一代師傅主理，將各款經典港式麵包重現，同時亦創作咗一系列新潮嘅打卡包點。

呢度嘅麵包麵包每日新鮮製作，搓粉、唧醬等等工序繁多、注重細節，就好似飛碟包咁，而家好少地方買到喇。飛碟包因為個底有多個環，形似飛碟而叫飛碟包，但正正就係多咗呢個環，喺焗爐盤中佔嘅位置就比坊間常見嘅「鮮奶球」多咗近一倍，而冇乜幾多間舖會做。

呢間麵包舖唔止堅持繼續做，仲加入創新元素，每個包都唧入流心餡，令到食起上嚟外層酥脆，而中間就瘋狂爆漿流心，多重口感。幾款口味包括阿華田、Oreo、宇治抹茶同鷹嘜煉奶。每日限量100個咋留意返。

而菠蘿包亦有多種玩法，除咗傳統菠蘿包外，另有菠蘿方包、芝心拉絲菠蘿包同冷凍菠蘿油。菠蘿方包有3款口味，長方體嘅方包舖上菠蘿包脆皮，上層香脆下層軟熟，幾款味道各有特色，黑芝麻湯圓咬落煙韌、宇治抹茶紅豆香甜、紫薯嗰隻更有啖啖紫薯蓉。

至於芝心拉絲菠蘿包，則喺內餡中夾有鹹香嘅芝士，仲有拉絲效果添。

另一款特色麵包就係蒜蓉包喇，重口味嘅朋友，佢哋有芫！荽！味蒜蓉包！其他口味包括士同明太子等，蒜蓉包口感綿密，原來係因為使用嘅新鮮酵母由師傅自家培養，天然健康，配合低溫發酵技術亦有助提升麵包組織，造出一個個綿密嘅包包。

森林麵包

地址：牛頭角振華道70號樂華商場地下111號舖

文：Kar

相、片：Tom Li