老豆2年半冇出過家門 韓君婷自揭返英國原因 明言「我會返香港」

1997年亞姐冠軍韓君婷，日前被網上節目拍檔梁思浩爆料，指佢會返英國。唔少人都以為英國籍嘅韓君婷係跟隨移民潮返家鄉生活，而佢尋日就喺節目親自澄清返英原因。

韓君婷話佢喺英國獨自生活嘅「鬼佬老豆」年事已高，近排君婷得知阿爸眼朦又行動不便，於是決定向思浩請假返老家探阿爸，如果阿爸情況冇問題就會返香港。韓君婷仲話相信自己處理得到，叫大家唔使擔心。

而喺節目入面，韓君婷提到更多返鄉原因，原來「鬼佬老豆」喺疫情爆發2年半以來，都冇出過門口，仲講大話呃君婷有出去覆診，打疫苗都係好在英國有上門注射服務。君婷覺得老人家好少開口講自己情況，於是同節目主創梁思浩立即交代，思浩仲叫佢即刻買機票走。而家韓君婷向節目請定2個月假。

被認為係歷屆之中較為高質嘅韓君婷，曾經一度退出娛圈，去新加坡幫家人打理生意。後來韓君婷回流香港，間中參與幕前演出，今年初申請破產，自辯透露因為母親早年患病而欠下醫藥費，後來疫情打擊之下失業。韓君婷曾經同同屬亞視出身嘅蔡國威關係密切，更一度同居2年，但後來鬧翻更稱被迫遷。之後又有傳媒爆韓君婷做網購平台帶貨兼自己搬貨，嘗試自力更新。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！