聲夢傳奇｜炎明熹連奪三獎成大贏家 背後功臣高晨維曾是歌手？

無綫歌唱選秀節目《聲夢傳奇》總決賽已於周一晚上（19日）播出，最後由炎明熹（Gigi）擊敗姚焯菲（Chantel）， 以大熱姿態橫掃「《聲夢傳奇》專業評選大獎」、「《聲夢傳奇》觀眾熱選大獎」及全場總冠軍「《聲夢傳奇》傳奇新星」獎項，成為三料冠軍。炎明熹低頭忍淚發表得獎感言，指希望可趁暑假返去內地探父母，更感激隊友們同老師們；而坐喺台下嘅歌唱老師高晨維見到學生炎明熹奪獎，比佢喊得更激動。

炎明熹由12歲開始就到高晨維開辦嘅音樂學院跟佢學唱歌，炎明熹亦曾指自己嘅藝名係由老師幫佢搵著名玄學師傳而改嘅，過往亦陪伴炎明熹走過多個歌唱比賽，係佢音樂路上其中一個伯樂。

高晨維出生自音樂世家，10歲開始演出，12歲學習聲樂，13歲參加唔同嘅歌唱比賽，最後喺「新城997 Top One 新一代－劉德華慈善歌唱比賽」公開組中勇奪冠軍，15歲加盟Sony Music，翌年推出唱片《我不是天使》，其製作班底包括雷頌德、陳永明及吳國敬等著名監製。不過，喺兩年後因為厭倦娛樂圈生活模式選擇退出，繼續學習音樂課程。及後，高晨維分別推出過3張發燒唱片，更於2013年創立音樂學院，致力栽培下一代，而炎明熹正正就係其中一位。高晨維指炎明熹嘅成功並唔係一朝一夕，當大家放假時，佢都會繼續上堂練習，而炎明熹嘅歌手道路先係啱啱開始，會一直支持佢。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！