聲夢傳奇｜炎明熹3年前濃妝參賽片曝光 網民指造型與唱功成熟唔似13歲

無綫歌唱選秀節目《聲夢傳奇》進入白熱化階段，16歲炎明熹（Gigi）每集尋求突破，唱功了得成為奪冠大熱，亦被網民封為「少女G.E.M.」。除咗比賽歌曲《沒有你還是愛你》喺YouTube已達176萬點擊率（截止6月30日），上星期播出一集更被寰亞音樂高層直指年輕有外型，亦有靚聲及性格，可以簽得，備受肯定。不過，部份網民批評炎明熹廣東話咬字唔正，眉上瀏海造型亦奇怪，外型唔似只有16歲；原名王佳恩嘅炎明熹12歲就喺音樂學院接受唱歌訓練，因為想入行發展歌唱事業而搵師傅改名，而近日有指TVB要求《聲夢傳奇》十強學員簽5年基本藝員合約，不過炎明熹就表示一切將交由姑丈決定。

近日，網上就有兩條炎明熹13歲「留言給20年後的自己」以及參加歌唱比賽嘅片段，網民大讚當年年紀細已經好唱得。第一條影片係炎明熹為《星聲Wannabe》拍攝，當時僅讀緊中二嘅佢就全素顏出鏡，大談理想，指若20年後自己做到實力派歌手，希望可以教人唱歌；網民留言稱讚炎明熹講嘢大方得體，又有目標，並指佢而家已經有實力做歌手：「只是短短4年你已做到！無庸置疑你依家已經係炙手可熱嘅超級新星」、「短短幾年後嘅今天，他所做到的，實在令人眼前一亮，為之敬佩」、「你已經可以去參加中國好聲音嗰個級數！」等等。

至於第二段影片則為炎明熹參加《全港流行聲樂大賽2019》嘅比賽片段，當時炎明熹以濃妝及八字瀏海造型上陣演唱Adele《One And Only》，網民直言炎明熹唱出實力派歌手既底蘊，甚至覺得佢好似年輕時代嘅Alicia Keys：「點解13歲已經唱得咁好，佢唱歌天份係天生」、「見到香港樂壇曙光」、「有冇筷子，夾一夾中指，真係上晒身」等等。網民著眼炎明熹唱功以外，造型亦遭熱議，指佢當年外貌過於成熟：「樣子完全不似她，更似23歲」、「當年係正常頭髮裝喎」、「嗰陣時個樣仲成熟過而家」、「呢代好早熟呀，叔叔31歲仲好baby face....」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！