雅虎香港新聞 聲夢傳奇2丨XiX獲Eric kwok盲撐惹反感 Vici劣評最多
TVB選秀節目《聲夢傳奇2》已經完成團戰合唱對決， 最後10強順利誕生，包括Ben胞妹趙頌宜Maggie﹑趙小婷Pamela﹑趙紫諾Sabrina﹑侯雋熙Duncan﹑劉詠彤Angel﹑彭家賢Zayden﹑文佐匡Sean﹑黃洛妍Janess﹑XiX及任暟晴Jasmine。不過網民對XiX躋身10強感到不滿，而Eric Kwok同佢哋嘅表演更成為導火線，網民就歸納咗4大罪狀。
賽制不公
早前播出嘅最新一集，壓軸一戰由兩大總監陳奐仁及Eric Kwok分別領軍，Eric Kwok搏老命，甚至帶埋後空翻，陪住XiX跳唱陳奕迅嘅《重口味》，不過呢個表演成為導火線，令唔少網民感到不滿，覺得《聲夢傳奇2》根本就係盲捧XiX，節目賽制不公平，點解XiX可以同單非嘅參賽者對戰。
Eric Kwok盲撐惹反感
雖然Eric Kwok及XiX都好落力表演，不過敗給陳奐仁與Janess嘅《閉目入神》，同時網民們對佢哋唔多受落，認為好有爸爸帶住囡囡表演嘅感覺、似雜耍表演、XiX淪為配角、將XiX嘅缺點暴露晒出嚟、及被淘汰嘅Jason同Vivian表現更好等等。喺表演後，Eric Kwok依然不忘硬sell佢哋，話佢哋唔止可愛，仲可以型格。Eric Kwok都唔係第一次盲撐XiX，好似佢試過喺節目中講過：「邊個評審話佢哋唔好，就係同我過唔去。」 其實Eric Kwok越係咁做，網民就越反感，唔明點解Eric Kwok要保住佢哋，仲懷疑TVB有偏私佢哋。
XiX定位奇怪兼冇星味
由劉芷君Aster、梁善知Crystal、楊秉頤Caitlin、繆昀希Charlotte、鄧曉殷Kiele及莊殷玥Vici組成嘅XiX，喺《聲夢傳奇2》一開始已經感覺備受力捧，不過唔少網民認為成員們嘅狀態同喺《聲夢Junior》嗰時差唔多，實力未到家，而佢哋嘅定位係Dancer，外形欠星味，仲叫佢哋不如返去讀書，再唔係就鍛煉下先再出嚟。
Vici被指外型唔掂又造作
年紀輕輕嘅XiX飽受網民批評，當中劣評最多嘅就係Vici，有指Eric Kwok特別偏袒Vici，經常企C位嘅Vici，今次表演《重口味》時仲同Eric Kwok對Rap，不過Vici觀眾緣欠奉，網民直指佢係最造作及外型唔掂。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！
是日精選
