聲夢傳奇2｜曾志偉點名力讚女團XiX 6成員周身刀張張利 實力不容忽視

無綫全新歌唱比賽節目《聲夢傳奇2》將於6月11日正式登場，上月尾舉行首個記者會，23位入圍學員首度現身會見傳媒，期間TVB總經理（節目內容營運）曾志偉點名力讚《聲夢 JUNIOR》女團XiX係大熱門，6名成員莊殷玥（Vici）、劉芷君（Aster）、梁善知 （Crystal）、繆昀希（Charlotte）、鄧曉殷（Kiele）及楊秉頤（Caitlin） 隨即備受關注。

女團XiX嘅6位成員年齡介乎13至15歲，各人喺《聲夢JUNIOR》時已經有亮眼嘅演出，成員包括香港藝術體操港隊運動員劉芷君及被指擁有憂鬱眼神嘅莊殷玥，唔好睇成員們年紀輕輕，佢哋個個都係周身刀、張張利，而且表演經驗非常豐富，所以被曾志偉話係大熱門係絕對有道理。

劉芷君（Aster）
現年14歲嘅Aster多才多藝，9歲已經係香港藝術體操港隊運動員。另外，Aster自細開始參加不同種類嘅比賽，至今獲得嘅獎項超過15個，Aster曾經喺比賽時演唱蔡依林《特務J》，片段獲得高度評價。2020年Aster開始演藝教育中心進行專業培訓 ，擁有 ABRSM Music Theory 5 級、ABRSM Piano 6 級、ABRSM Singing 6 級、RAD Ballet 8 級實力。有樣有實力嘅佢喺參加《聲夢JUNIOR》時被唔少網民認為佢可以殺入四強，可惜最後大熱倒灶。

莊殷玥（Vici）
同樣與Aster一樣未能晉身《聲夢JUNIOR》四強嘅Vici，雖然佢係上年先開始學唱歌，不過就成功贏得至少12個不同種類嘅比賽嘅奬項。另外，動靜皆宜嘅Vici亦曾經參加大大小小嘅賽車比賽，成功獲得至少6個獎項。

梁善知 （Crystal）
現年15歲嘅Crystal學唱歌只有一年半時間，不過佢喺2015年開始已經參加唔同嘅比賽，更獲得至少14個獎項。為咗可以增加實戰經驗，Crystal試過喺外國唐人街Busking。

繆昀希（Charlotte）
現年13歲嘅Charlotte，喺《聲夢JUNIOR》憑演唱《跳舞街》獲得一眾評判高度評價及備受網民關注。雖然Charlotte係成員中最細，不過佢嘅比賽經驗都非常豐富，除咗街舞之外，佢亦參加唱歌、跳舞及朗誦等比賽，至少獲得18個獎項。Charlotte擁有ABRSM Singing 5 級（Distinction）及 ABRSM Music Theory5 級（Merit）實力。

鄧曉殷（Kiele）
現年14歲嘅Kiele，擁有ABRSM Piano 5 級、RAD Ballet 8 級資格及 7 年大提琴拉奏經驗。喺11歲開始，Kiele參加不同嘅音樂劇演出，並曾獲得超過一年嘅百老匯式歌唱專業訓練。

楊秉頤（Caitlin）
有「JUNIOR杜麗莎」之稱嘅Caitlin只有14歲，自細已經開始拉小提學琴、彈鋼琴及於9歲開始自學結他，曾經係「香港歌劇院」及「香港演藝學院」合唱團學員，擁 ABRSM Singing 8 級、ABRSM Violin 8 級、ABRSM Piano 5 級、ABRSM Music Theory 5 級、RAD Ballet 7 級資格。佢同樣參加不同種類嘅比賽，例如唱歌、小提琴及鋼琴等等，至少獲得20個獎項。另外，Caitlin更係一名游泳健將，多次獲得三甲佳績。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！