聲生不息︱TVB剪到一忽忽被網民鬧唔尊重歌手

TVB與芒果TV合作製作音樂綜藝節目《聲生不息》由何炅及王祖藍擔任主持，節目喺噚晚（24日）首播，與ViuTV嘅《CHILL CLUB推介榜年度推介21/22》對撼。節目搵嚟16位香港及內地殿堂級歌手與新生代歌手參與，包括林子祥、葉蒨文、李克勤、楊千嬅、李健、林曉峰、李玟、周筆暢、毛不易、劉惜君、炎明熹、曾比特及單依純等等，分為男、女兩隊對戰作賽，重新演繹港樂經典，戰況可以話係相當激烈。而家就同大家睇下網民對首集嘅反應啦！

舞台效果被激讚
《聲生不息》嘅舞台空間好大，而且設計非常華麗及出色嘅燈光背景，再配合歌手們嘅表現，令到唔少網民大讚舞台效果非常好，留言話「​​人地舞台設計,造型真係X打香港果D」、「個台真係靚到」、「係人民幣既力量」、「講真，聲生不息令我最驚喜係舞台效果超正，睇演唱會咁，呢度加好多分」、「嗰啲星星效果好靚」、「個台同拍攝都好靚」、「個台燈光效果好靚」、「啲舞台效果真係靚」、「無論設備定係舞台都好重本，好比到歌手發揮」及「大製作」等等。

節目大陸味濃
《聲生不息》由《我是歌手》原班人馬製作，所以節目製作風格同TVB嘅節目好唔同。一班香港網民似乎唔係好習慣，睇完都認為節目大陸味濃，紛紛留言話「個節目製作風格成陣大陸味」、「節目效果太過大陸 已熄」、「大陸陣土味好重」、「嘩 睇緊大陸節目」、「根本成個節目係大陸節目」、「港樂淪為國貨」、「好X老土，懷舊都不得了」等等。

後期執音太勁
一班演出歌手們喺台上落力演出，不過經網民們就認為後期執音太勁，完全冇live嘅感覺，紛紛留言話「Turn到播碟咁」、「修得太勁，睇mv咁」、「好似播cd咁...有d假」、「後期執到冇哂live感覺」、「Tune到咁X樣搵薛影儀去唱都贏啦」、「後期應該執得好多，唱live邊有甘標準」、「真係求其一個垃圾上到去都tune到變歌王歌后」等等。

點解搵林曉峰參賽
51歲嘅林曉峰（阿Lo）喺首集與李玟對戰，並演繹張學友嘅《寂寞的男人》，佢俾香港觀眾嘅印象仍然停留喺《獎門人》嘅主持，所以唔少網民對於佢今次參賽都表示拗晒頭，紛紛留言表示話佢唔係高手，唔明點解佢會參賽，例如「林海峰都係歌手？」、「林曉峰憑咩」及「林曉峰根本不是歌手，為乜揾佢」等等。

TVB剪到一忽忽 好唔尊重歌手
TVB喺噚晚播放兩小時香港版《聲生不息》，唔少歌手都被剪去部份表演環節，唔少網民睇完節目都表示相當不滿，因為咁樣係唔尊重歌手及幕後工作人員，同令大家睇得唔舒服，例如「冇心播就唔好播啦 左cut右cut」、「不如唔好播算喇，cut到咁，上網聽算」、「真係好尊重啲歌手」、「唔想播就唔好播啦 cut到咁 趕客咩」、「TVB CUT 到一忽忽 次序又撈亂哂 點睇」、「好心好似聲夢分兩集播，cut到好唔尊重歌手」、「雖然有啲內地歌手在香港無咩人聽過，但播返人哋完整一首作品 ，是基本的尊重吧。。。台前幕後都不容易。。。。」、「有d歌手cut淨2句好唔尊重人，雖然佢地香港少人識但都俾香港人完整d咁接觸一下啦」、「一定要去返芒果睇返成個足本版先知人地幾用心去做節目，tvb要檢討下，為左就廣告剪到咁，播少集愛回家會死咩」及「還是看原版的好，香港版總覺得怪怪的」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！