肥媽李鼎丨游嘉欣化身問題少女 烏龍百出唔識分糖鹽激死李家鼎

肥媽（Maria Cordero）和李家鼎（鼎爺）聯手主持嘅烹飪節目《肥媽李鼎》前晚（24日）首播，節目逢周一至三晚上10時半於翡翠台播出。肥媽以「有乜煮乜」、「平靚正快」見稱，李家鼎則擅長傳統功夫菜，兩名廚藝高手今次除咗教煮餸，每集仲會配合唔同主題，一邊煮餸一邊交流「八卦經」。更新鮮嘅係，二人將帶住A0女神游嘉欣；游嘉欣嘅對答惹出唔少笑料，睇得出平時完全無入廚房，就連李家鼎都投晒降表示怕咗佢，不過就係游嘉欣呢份傻氣而減低現場火藥味。

李家鼎憶述當年拍攝《香港82》一場食飯戲，演員們集體肚屙，於是自薦炮製「蘿蔔魚鬆」，佢喺《肥媽李鼎》節目中就示範呢道菜式，當李家鼎形容要用鑊剷將魚膠推平時，游嘉欣卻再問一次：「哦，鋪平佢？」，令李家鼎忍唔住串佢：「唔通起座山咩？梗係撳平佢啦！鋪平係被鋪先叫鋪平！」李家鼎直言畀游嘉欣玩死咗，游嘉欣又將「攤」涼聽成「撻」著，將魚鰭講成「翼」、「魚鬆」講成「肉鬆」等等，學煮嘢食時更表現得雞手鴨腳，唔單止分唔到糖同鹽，幫手切材料時被嫌手腳慢及唔夠力。游嘉欣表示烏龍百出並唔係節目效果，只係做番平時嘅自己，平時都係比較多問題嘅一個人。對於游嘉欣主持表現，觀眾有讚有彈，部分網民覺得游嘉欣咁樣好可愛：「有游游真係好睇，佢做得好好，笑死我」、「同意呢個3人組合好有化學作用」、「好似幾好笑咁，搵游游點都好過嗰個6號啦！」等等；部分網民就話頂唔順游嘉欣：「若果唔係節目效果，游游嘅表現拍得住《開心速遞》嘅「無知May」，係咪可以叫「無知游」？嗱，冇冒犯之意。」、「兩位大廚對住嘉欣佢，真係嘔血」、「游真令人討厭，扮可愛其實系傻」、「佢係咪讀番書，唔多識中文。肥媽話機會留俾有準備既人，但條女唔夠準備都係有機會」等等。

昨晚（25日）播出一集以「廚藝界的明爭暗鬥」為題，游嘉欣繼續擔任問題少女，問及肥媽和李家鼎星廚背後係咪會有明爭暗鬥，又問到：「星廚係咪好賺錢？」肥媽就直接承認以前未煮飯時都無咁多收入，又大爆曾經因被抄襲而失Job：「我失去咗馬來西亞Job，本來傾緊兩個演唱會，點知有人話我要做阿燦（廖偉雄）嘅嘉賓，我心諗幾時有應承阿燦做嘉賓呀？去到馬來西亞睇報紙，原來有個肥嘅女人整咗我個頭髮去唱歌，叫『馬西來亞肥媽』！我咁就冇咗兩個Job喇！」游嘉欣又問肥媽驚唔驚畀人話爆咁多嘢出嚟，肥媽就教精佢，表示做呢行第一樣就要唔好驚畀人話：「游游...冇人話你，你係唔會紅㗎！」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！