肥媽連環出片 讚梁家輝吳鎮宇用心教戲 爆柯受良一個原因搵命搏飛越黃河

而家唔少藝人都開小紅書帳戶，《中年好聲音2》評審之一肥媽就係其中一個。肥媽上載嘅片除咗教煮餸之外，仲會不時發表評論。呢期內地綜藝《無限超越班》搵到吳鎮宇同梁家輝做導師，早前肥媽就拍咗條片盛讚二人，標題仲話佢係「內娛判官」！

肥媽認為吳鎮宇鬧學員鬧得算收歛，而且都係想學員好，值得俾掌聲。肥媽順手提到以前拍戲用菲林拍，唔似而家可以係咁NG，所以佢地開工要做足功課，唔會好似《無》嘅學員咁忘詞忘對白，否則俾人鬧爆，甚至叫你「自己俾錢買菲林」。肥媽又讚梁家輝喺節目中親身示範演技，唔係得把口講就算，「係真真正正教你」。

隔日肥媽又出咗另一條片，講老牌藝人敬業精神，係真正拎條命去搏。肥媽講起廿幾年前飛車跨越黃河嘅柯受良（小黑），並透露小黑哥當年飛越黃河之前，同佢講咗點解要完成呢個壯舉，「因為我係中國人，我唔飛遲早有外國人飛，我地中國人一定要飛先，飛到我就係偉人，飛唔到咪算喇」。肥媽大爆當年小黑哥飛越黃河之前無得試跳，一切都係靠計數，而且安全措施唔多，汽車落地位置只係墊咗紙皮箱同床褥，真正係搵命搏。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！