胡鴻鈞秘密回巢 獨霸「一哥」寶座

有傳歌手胡鴻鈞（Hubert）隨着不和的前星夢高層何哲圖離職後，秘密回巢舊公司，實行與周柏豪再爭「一哥」之位！風騷的他前晚錄節目時無懼緋聞女友蔡思貝呷醋，明言對同場的張敬軒「心動」，全晚黐到實，又捉實對方手仔兼搭膊頭。

胡鴻鈞2年前盛傳激嬲何哲圖遭「雪藏」，自此互有心病，個多月前宣布不再跟星夢續約轉簽邵氏，不過隨着何哲圖離職，據知他已秘密重返星夢大家庭，更將推出新歌。唱片公司官網已上載其新歌造型照，相中見他滿面傷痕又戴上頸箍，但嘴角帶笑。昨日受訪時被問到回巢一事，他只說：「哈哈，好快有消息，再同大家公布。」

據知他離開不足2個月就食「回頭草」，除了傳與何哲圖有關外，亦因他被現任唱片公司CEO何麗全的誠意打動，他大有機會「坐正」，毋須再與周柏豪瓜分「一哥」之位。

獲「新老闆」加持，正趕拍新劇《十月初五的月光》的Hubert前晚甫收工就飛車入將軍澳電視城為新改革的節目《勁歌金曲》任嘉賓，同場有張敬軒、衛蘭、衛詩、JW、李幸倪及林奕匡等，亦見無綫高層曾志偉和何麗全，場面熱鬧。

想蔡思貝送車位

受訪時，Hubert興奮表示：「今朝開早班，見到皇上（張敬軒）好緊張，每次見到佢都有心動感覺，因為佢係我偶像，未出道時已經鍾意佢，見親佢都好似小粉絲咁！」問到「女友」蔡思貝可有為他慶生？他說：「同我講咗句『生日快樂』，叫我加油拍劇。」他恭喜對方做車位業主，問到會否期待與對方補祝生日？他即笑說：「叫佢送咗個車位畀我，或者畀相我望吓，羨慕吓都好！」

至於張敬軒有見同場有30多位新、舊歌手，場面相當熱鬧，直言「感覺返晒嚟」：「見番以前頒獎禮場面。」提到《勁歌》與ViuTV音樂節目《Chill Club》對撼，他認為兩個節目同在黃金時間播放，證明同樣重視音樂。為節目打頭陣的他又說：「節目好唔好睇唔係取決於一個人，要靠大家齊心協力。」