胡鴻鈞開騷 邀炎明熹助陣

歌手胡鴻鈞昨日到電台宣傳新歌《謝謝你的應援》，他透露近日正為演唱會忙於綵排及宣傳：「新歌係一首送畀歌迷嘅歌，切合番演唱會主題，依排忙住排舞，我都希望可以畀到驚喜大家。（會Show肌？）睇吓操成點，要過到自己嗰關先得。」他透露已邀請炎明熹及鄭欣宜擔任表演嘉賓，問到會否與欣宜跳辣身舞？他說：「佢啲舞好得㗎，我哋仲研究緊，睇吓點樣演出係最好睇，希望畀到驚喜大家而唔係驚嚇啦！」另外，對於早前網上抵制事件，他感謝大家關心，指做好自己工作就是最好回應。