與家人分開過節 古佩玲呻被遺忘

藝人古佩玲長年與家人分隔異地，昨日出席宣傳活動時，坦言十分掛念親人，但相信農曆新年亦未能團圓，形單影隻好慘情！

滕麗名、呂慧儀、謝嘉怡及古佩玲等，昨日在無綫電視城出席《愛．回家之開心速遞》新春宣傳活動，眾人在道具桃花樹下轉圈祈福，又為今日46歲生日的滕麗名送上祝福。農曆新年將至，古佩玲表示家人在深圳居住，相信未能團聚：「姪仔已經1歲大，淨係見過一次，我諗佢都唔記得咗我！我有考慮過返內地同屋企人過年，但要隔離廿幾日，冇咁多假！」

林淑敏同倉鼠拍劇

而謝嘉怡的父母由蘇格蘭來港，過年可以一家團聚：「會返大埔同嫲嫲食飯，細個喺蘇格蘭，過年氣氛唔太濃厚，有日返學老師同我講：『你聽日唔使返學校。』原來爸爸幫我請咗幾日假。」

林淑敏談及昨晚的《愛》劇講述她捲入騙案，誤以為細佬Terry變成蜥蜴及倉鼠，適逢近日有倉鼠被驗出帶有新冠病毒而成為全城焦點，她說：「呢集之前拍落嘅，倉鼠都有主人。」許家傑打趣說處境劇經常「預知未來」，故以倉鼠為主角，林淑敏即說：「咁要畀我中獎呀！我有宗教信仰，唔可以買六合彩，我只祈求幾個字『只想身體健康』。」

另外，傳因遲大到而被調離劇組的張景淳昨日不見蹤影，劇中「老婆」呂慧儀出言護航，但前輩單立文直言：「紀律好緊要，珍姐（曾勵珍）成日講，唔能夠一個人犯錯而影響成個劇組，我好認同。我成日聽前輩講，準時係基本嘢，唔好咁多借口，如果真係有事，就打返嚟交代一聲。」