【與李旻芳激似樣】《反黑路人甲》吳嘉儀努力做好每個角色 望觀眾記得全名

無綫劇集《反黑路人甲》正在熱播中，除咗7位主要靚女演員成為焦點之外，莊明麗Angel姐（高海寧飾）助手Kitty都成功引起觀眾關注。有唔少人都誤以為係《東張西望》主持人李旻芳（Lucy）飾演，其實係同佢外貌好相似嘅吳嘉儀嚟架！

29歲嘅吳嘉儀（阿七），於香港演藝學院主修表演，喺讀書時間就已經兼職做模特兒同埋為香港電台拍攝教育電視，畢業後就加入無綫藝員訓練班。入行5年以嚟，佢都參演過唔少劇集，不過絕大部分都係唔多起眼嘅角色，例如《完美叛侶》、《幕後玩家》、《同盟》及《大帥哥》等等。直到上年佢開始被人留意，好似喺《金宵大廈》中雖然戲份唔多，只係喺單元「鴉烏」中飾演傳說中會將小朋友捉走嘅「鴉烏婆」，一身全黑色嘅打扮，單靠眼神去演戲，成功令觀眾留下印象深刻。

近排，吳嘉儀繼續劇接劇之外，劇集戲份亦加重。繼早前《迷網》飾演楊明下屬女警員Fion，喺現時兩線黃金檔期都有佢嘅蹤影，喺《過街英雄》飾演偵探社職員秦開心及《反黑路人甲》明星助手Kitty，經常喺女主角身邊出現，幫手解決困難。不過喺星期五嗰集《反黑路人甲》就講到莊明麗被cut job，而Kitty就被調去做其他明星嘅助手，吳嘉儀都有喺社交網站留言話：「打工唔難 搵個好BOSS就好難🙈 加油丫Angel姐（高Ling) 快d番黎丫 或者 快d帶埋我走啦 ....」

雖然佢劇接劇，不過都未能成功入屋，相信仲有唔少人唔記得佢個名，同埋將佢同《東張西望》主持李旻芳撈亂。由於佢哋真係好似樣嘅關係，連《愛·回家之八時入席》劇組都搵佢哋飾演兩姊妹。一直默默耕耘嘅吳嘉儀就話佢已經習慣咗，不過佢會好努力做好每一個角色，希望觀眾未來會記得自己既全名。