與王宗堯分別半年 太太Julia長文訴心聲「揀多一百次都會選擇同你共患難」

藝人王宗堯因2019年七一衝擊立法會案被控暴動罪成立，三月中被判囚6年2個月。王宗堯同太太Julia去年10月喺太子開設小食店Happy Belly，但由於長期合作嘅食肆友利冰室突然拖糧欠租停業，Happy Belly亦受波及。Happy Belly月初於IG宣布為配合業主追討友利欠租及收回物業，喺上月9日起暫停營業。

若果由定罪當日還押計起，王宗堯同Julia已經分隔半年。Julia尋日喺IG發文抒發心情，原來除咗要處理鋪頭結業，佢地嘅貓咪亦出現突發狀況，Julia形容剛過去嘅七月「可惡」，並感慨「過去幾個月最大嘅感受係發現原來好多野都可以突然變得好難」。幸而每次探望王宗堯都令Julia重新振作。「不過每次見面你嘅鼓勵都會為我叉滿電。每次探訪嘅時候你表現出嘅從容都令我好珮服。寫比我嘅信每一封都帶住滿瀉嘅正能量，喺HB （Happy Belly）暫別之後嘅第一封信你都掛住畫畫比我，只記住留低開心嘅片段」。

Julie感謝王宗堯之餘，更無悔要面對一切困難。「時窮節乃見，身處嘅境況並無改變你嘅善良，真係好多謝呢一個你。雖然眼前嘅日子過得唔容易，但如果再比我揀多一百次，我都係會選擇同你共患難」。

過去王宗堯為HKTV劇集《選戰》演出，劇集插曲I’ll be There創作人陳詩慧Eva同王交情匪淺。近年少有推出作品嘅Eva寫咗一首獻給王宗堯嘅歌Dear Greg，Julia都有提到呢首歌並多謝陳詩慧「寫咗一首咁輕快地令我喊唔停嘅歌。唔知幾時你先有機會聽到呢？」。陳詩慧之前提到，王宗堯喺獄中提醒佢地識咗十年，叫Eva做隻I’ll be There十年版本仲要Rap，多年前有rap過嘅陳詩慧今次都親自開金口。而呢首歌推出一日已經喺音樂平台廣東歌收聽排行榜成為冠軍。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！