艾妮同張家輝親熱 呼吸唔到

東方日報
·1 分鐘文章
艾妮笑言感情生活是「冬眠」狀態。
艾妮笑言感情生活是「冬眠」狀態。

英皇「發燒女聲」艾妮繼拍網劇《女法醫JD》與台灣型男張孝全做對手戲後,之前又與影帝張家輝合作拍保險廣告,她說:「真係發夢都估唔到可以同佢合作,收到消息嗰日開心到尖叫!拍之前好緊張,收到稿之後係咁溫書唔想累街坊。」兩人飾演由同事變女朋友再到老婆,埋位前張家輝又跟她傾偈,她說:「嗰陣佢手指尾屈唔到,因為條筋斷咗,我做過護士,可以同佢講呢方面嘅知識,佢好Nice,對後輩好好。」

廣告中兩人有少許親熱場口,她笑言緊張到呼吸唔到:「我哋額頭掂額頭,我將佢隻手擺喺自己塊面度,好彩拍嗰場戲前大家算係熱身咗。」她預告廣告會添食,希望可以再與張家輝合作。

31歲的她談到感情生活時笑說:「仲係冬眠緊,我咁遲先入行,想追番之前嘅時間。」雖然媽咪都緊張她的終身大事,但她覺得未來幾年不會結婚住:「我覺得自己會閃婚,可能拍半年拖就結婚,所以我唔急,目標係38歲前生小朋友。」個性獨立的她會一個人打邊爐、睇戲及旅行,身邊暫時未有追求者,其擇偶條件最緊要有Feel,希望係叻嘅男仔。

艾妮能與影帝張家輝拍廣告,難怪開心到尖叫!
艾妮能與影帝張家輝拍廣告,難怪開心到尖叫!