茶記打工學廣東話 蔡小蝶苦幹10年 阿姐變亞姐

蔡小蝶移民來港10年,慶幸未有受到歧視,反而頗受寵愛。
蔡小蝶移民來港10年,慶幸未有受到歧視,反而頗受寵愛。

出爐亞姐冠軍蔡小蝶,多年前從內地移民來港,她自爆當年為學好廣東話,15歲就到茶餐廳打工。轉眼10年,她由「茶水阿姐」搖身一變成為選美冠軍,勝在夠勤力!至於亞軍何雙妍參選獲男友支持,季軍高文君則因失戀才參賽!

《2020亞洲小姐競選香港區決賽》冠軍蔡小蝶、亞軍何雙妍及季軍高文君日前接受專訪,飲恨港姐的蔡小蝶最終變成亞姐冠軍,充滿戲劇性。其實她並非天生選美狂,鬥靚只因遇上世紀疫情,她說:「唔覺得自己特別靚,以前冇諗過選美,但疫情少工作,反正得閒就不如去參加選美啦!」

何雙妍唔怕甩拖

深圳出世的蔡小蝶14歲移民來港,承傳了潮州人的勤力基因,為融入社會,15歲邊讀書邊到茶餐廳打工:「嚟咗10年,當初唔識聽唔識講,覺得讀書唔識廣東話會畀人杯葛,所以夠15歲就去茶餐廳返工,唔係要幫補家計,係為咗學廣東話,最叻講凍檸茶,哈哈!」

由第一份工做茶餐廳開始,蔡小蝶工作冇停手,做過樓面、知客、酒店炒散、禮儀小姐、Show Girl、KOL,至今一直自己賺錢自己使,沒有問過家人攞錢,她笑說:「屋企由細就灌輸要靠自己、獨立嘅思想,所以我好勤力o架!」她工作勤快,不單未有被同事欺負,更被錫到燶,在餐廳做知客時訓練出抗壓能力:「做知客派飛,有啲客嫌等得耐會發脾氣、投訴,抗壓能力就係咁練番嚟。」性格樂觀的她自言玩得又愛笑,自覺有潛質做諧星,希望公司提攜。

拍過電影及ViuTV劇集的何雙妍,背後有感情穩定的男友做後盾,讓她在演藝事業搏殺。她不擔心所謂的「選美分手魔咒」,她說:「我哋都係活在當下,理唔到之後嘅事,反而係男友鼓勵我入行,佢好信任我。」

高文君失戀求變

至於高文君透露選亞姐全因失戀,與男友分手後希望轉換環境,認識更多新朋友而報名。被網民封為「女神」的她,在香港大學修讀土木工程系,得獎後豈不是吸引更多同學注意?她笑說:「冇呀,因為依家係網上課程,大家見唔到面,下學期先要返學。」她對拍拖順其自然,視成熟又穩重的古天樂為「男神」。

何雙妍(左起)、蔡小蝶與高文君,準備好迎接新挑戰。
何雙妍(左起)、蔡小蝶與高文君,準備好迎接新挑戰。