莊思明無悔愛得攰 嫁硬楊明

東方日報
·3 分鐘文章
莊思明已有生B計劃,揚言起碼生兩個!
莊思明已有生B計劃,揚言起碼生兩個!

藝人莊思明與楊明拍拖5年,攜手經歷高山低谷,跨越重重難關。目前受官司影響的楊明全面停工,幸運地獲女友義無反顧支持及陪伴。思明不諱言已視男友為終身伴侶,從未有絲毫悔意,亦沒有打算放棄這段感情,更大爆被雙方母親催生B,不排除年內隨時步入教堂。

莊思明形容與楊明的相處,尤其近兩年經歷社會事件及面對輿論壓力,箇中感受只有他們兩個最清楚。問到有否遇到想放棄這段感情的一刻?她爽快答:「冇!因為真係經歷咗好多。有試過覺得好攰嘅,我咪匿喺房冷靜吓,想辦法釋放情緒,跟住就冇嘢嘞!我同自己講,關關難過關關過,人生就係咁㗎啦!(楊明求咗婚?)佢周圍同人講等我求婚,話我要佢等咗咁多年喎!(婚禮今年完成?)未知,真係要睇疫情,人生大事嘛,梗係想至親好友喺齊度見證啦!」

改變自己遷就男友

別人眼中的楊明或許沒甚特別,思明卻視如瑰寶:「我最欣賞佢樂觀、單純、冇機心同孝順。佢唔會諗人有乜唔好,有時隨和到令我忟,好似試過有朋友十幾年冇搵佢,一聯絡就有嘢要幫手甚至借錢,我叫佢了解清楚先,對方係咪輸咗錢、欠大耳窿呢?佢會話番我諗得太多,會冇晒朋友,呢樣可以話係我哋唯一嘅衝突!」就因為對男友的了解及信任,她甘願改變自己作出遷就:「以前如果前面有牆,隔一條街我都提咗佢先,依家我會由得佢,除非佢真係撞埋去啦!」

贏得未來外母歡心

她剛完成新版《十月初五的月光》拍攝,劇中她扮演男主角「初哥哥」胡鴻鈞媽媽的年輕版,令她對生兒育女有所反思:「我好鍾意小朋友,計劃中起碼生兩個,坦白講都開始趕時間嘞,咁生咗又冇理由乜都唔理,淨係顧住做嘢,相信到時我會作出平衡。」她更自爆雙方媽咪一早已抱孫心切:「兩位媽媽都思想前衞,覺得唔結婚唔緊要,最緊要有B,尤其我媽咪見到我養咁多寵物,趁機叫我不如養人仔好過,唔明點解唔催我家姐先。」她坦言這年代「先有後婚」亦不是問題,反而男友性格較傳統。原來楊明早已贏得未來外母歡心,思明透露:「我媽咪好鍾意佢,兩個幾乎每日一電,媽咪反而少搵我。(你呷醋?)又唔會,佢哋相處得好,我仲少啲煩惱,身為長輩最想都係我哋健康同幸福啫。」

雖然戀愛大過天,但思明對事業也不是沒有期盼:「早幾年覺得好煩厭,點解啲人留意花邊新聞仲多過我嘅工作,咁樣好唔公平,其實每次有工作我都好畀心機做,我亦有好好咁裝備自己。舊年我續約,有同公司反映同爭取(機會),但明白近幾年太多新人,唔通仲同啲18、20歲爭咩?但如果你問我係咪想以演員為終生職業,可以嘅話我梗想,話晒係自己興趣嘛。」

喜歡做演員的莊思明,希望爭取更多機會!
喜歡做演員的莊思明,希望爭取更多機會!
莊思明與楊明愛得甜蜜,已到談婚論嫁的階段。
莊思明與楊明愛得甜蜜,已到談婚論嫁的階段。