菊梓喬反口拒請張景淳睇騷

菊梓喬（Hana）昨日舉行新碟簽名會，講到突然取消關注緋聞男友張景淳的Instagram，她一再澄清跟對方只是朋友，而早前她講過會請男方睇本月底的首個個唱，卻又轉口風要對方自行買飛，關係再「降呢」﹗

張景淳上月底被爆疑一腳踏兩船密會「長腳蟹」呂慧儀，辣㷫「正印」Hana而怒刪男方Instagram的關注。Hana受訪時表示跟張景淳只是朋友關係，若對方有拖拍會戥他開心，但問到作為朋友為何要取消關注？她解釋：「除咗Post自己啲相，都少玩Social Media，冇咁多時間經營，有好多朋友都冇Follow，呢個對我嚟講唔重要。（邀請佢睇騷？）買飛啦！成日叫朋友買飛入場支持。（同佢戴情侶錶？）呢度求其都搵到有人戴，隻錶太普通！」不過，Hana早前開演唱會記者會時，曾表示會請張景淳睇騷，更「愛屋及烏」請埋《愛．回家》全體演員，當初「諾言」不再兌現？

增肥突破百磅大關

Hana今次推出第三張黑膠碟，吸引大批Fans攜碟撐場，她興奮指雙碟面均印有其靚樣：「好迷戀自己咁！好開心前兩隻反應好，公司就再出，一早同公司留咗編號001嗰隻，唔使再同Fans換，依家三隻都係001！」提到首次個唱還有不足兩星期，她自爆剛剛才開始排練：「真係好驚，唔知點算！啱啱先定咗Rundown。（要跳舞？）有郁吓手、郁吓腳，老師有讚跳得好嘅。」

而另一樣令Hana淆底的是體力問題，見她四肢纖幼、身形如紙薄，但她透露體重已成功過100磅：「肥咗好多！之前得88磅，真係唔可以太瘦，之前唱到第五首又肚餓又暈，可能到時落台換衫嘅同時，要經理人餵我食飯！」