【萬千星輝頒獎典禮2020】劉丹爭啲重演關家姐事件 直播節目尷尬位 點少得「請坐低」

直播show好睇在反應夠真！尋晚【萬千星輝頒獎典禮2020】除咗陳自瑤嘅0表情即時展現神級演技之外，另一個洗版話題係胡定欣頒發「最受歡迎男角色」之前，介紹劉丹做《愛．回家》做足8年，一時走神嘅丹爺以為自己有獎於是企起身，好在胡定欣兜得快，丹爺先至冇行咗上台！唔少網民都話呢單嘢爭啲成為「關家姐」事件翻版。除咗「關家姐」，TVB直播騷仲有幾單經典尷尬事，諗起都毛管戙。

關菊英有獎 關心妍衝出嚟

喺《2008年度十大勁歌金曲頒獎典禮》，大會搵關菊英負責頒發傑出表現獎。呢個獎係俾一班上位中又未去到攞大獎嘅歌手而設，例如當年嘅關心妍。不過嗰年傑出表現金獎係由頒獎嘅關菊英奪得。可能關心妍都冇諗過有呢個咁巧妙安排，佢居然由舞台後方嘅座位行出嚟向關菊英擁抱，並且拎走獎座……即係，關心妍以為個獎係自己。當時3位主持都一頭霧水，提醒完關心妍先知自己出事！但係太遲嘞，呢件事已經成為網路笑料，關心妍索性化尷尬為力量，將呢件事寫成歌詞自己唱返，首歌就係叫《關家姐》。

羅力威胡鴻鈞要「換獎」 多得崔建邦

成日都有歌手幫電視台做嘢「換獎」嘅傳聞，原來真係會發生……不過就唔係有咩內幕交易。《2012年度十大勁歌金曲頒獎典禮》頒發最受歡迎男新人獎時，司儀崔建邦宣布時竟然將金獎同銅獎得主掉轉，本來金獎由胡鴻鈞奪得，變成俾咗羅力威；到三個歌手拎晒獎座之際，崔建邦知道出錯唯有認衰，搞到胡鴻鈞同羅力威要公然「換獎」……交換獎座呀！

李文彪上台申訴 Do姐執生值千金

呢件事足以證明識執生嘅司儀幾咁緊要！2002年TVB喺紅館舉辦《星光熠熠耀保良》，喺表演嘉賓薰妮出場前，前TVB藝人李文彪扮工作人員殺上舞台，將字條遞俾司儀之一丘凱敏，寫住係「李文彪先生捐款50萬」，丘凱敏不知就裡讀出。李文彪隨後搶走另一司儀蔡子健支咪，申訴自己多年前效力TVB拍劇受傷。同場經驗豐富嘅鄭裕玲知道出事，一手推開李文彪，之後再立即介紹薰妮出場，總算化解事件。

伍衛國走音大叫「請坐低～」

2006年TVB節目《超級靚聲演鬥廳》喺商場做直播，主持之一係以往拍劇多嘅伍衛國。可能現場氣氛太high嘞，伍小生大聲叫現場觀眾「請坐低」嘅時候，個「低」字嚴重走音，搞到身後嘅馬浚偉笑爆咀。唔少網民都將呢條走音片段二次創作，聽到停唔到。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！