雅虎香港新聞 【萬千星輝頒獎典禮2020】王浩信得獎公開感謝 陳自瑤疑似黑面 盤點「王浩信離婚」傳聞
喺【萬千星輝頒獎典禮2020】，憑《踩過界2》再度奪得視帝嘅王浩信，致謝詞時感謝太太陳自瑤(Yoyo)照顧囡囡，但係鏡頭所見嘅Yoyo木無表情，被網民戲稱「佢先係真正視后」！呢對夫妻結婚9年，但係近年不斷傳出感情生變嘅新聞，而且王浩信間唔中都有緋聞傳出，難怪觀眾覺得Yoyo「有啲嘢」。
拍劇撻著 奉女成婚
王浩信同大自己2年嘅陳自瑤2008年拍《野蠻奶奶大戰戈師奶》而撻著，拍拖2年幾趁住2011年11月11日好日子結婚，據報當時Yoyo已經懷孕，但係喺婚前有傳媒爆料，王浩信疑似出軌搭上陳冠希舊愛、當時年僅16歲嘅𡃁模Cammi（謝芷蕙）。不過似乎唔影響婚事，而囡囡靖喬喺2012年4月底出世。
由三線發力上位 同黃心穎蔡思貝江嘉敏緋聞
浩信同Yoyo喺囡囡出世後都有過「蜜月期」，社交平台會po家庭照，Yoyo亦會出席老公新劇宣傳，幫手建立形象。近年王浩信上位做到一線，好爸爸形象絕對係助力之一。但係因為拍劇同女藝員傳緋聞都時有發生。
2015年拍《東坡家事》時，同劇有「吸力強勁」兼再度合作嘅黃心穎，當時就有傳王浩信同心穎喺《東》劇北上拍攝期間友誼「突飛猛進」！消息傳到Yoyo耳邊據聞反應好大，但係事後仍然公開表示信任老公。
之後拍《踩過界》，戲中同「癲姐」蔡思貝拍住上，但亦都傳佢地過從甚密，甚至有報導爆劇組去打邊爐期間，蔡思貝同王浩信一齊失蹤十幾分鐘，事後王浩信否認其事。
到榮升視帝之後，王浩信拍《兄弟》同新一代小花江嘉敏一齊去英國拍外景，例牌傳緋聞。據報女方十分主動請教，不過好快江嘉敏就話拍完劇冇聯絡。
陳自瑤回應 越來越淡然
對比以前仲會出面撐，甚至話「王太只有一位」，近年陳自瑤對夫妻關係嘅傳聞，回應越來越淡然。2018年中有傳二人離婚兼趕老公出門口，Yoyo否認有咁嘅事，而且一家三口仲一齊生活，但係王浩信因為公事而另租地方處理，承認係「樓上樓下」。Yoyo當時亦拒絕用「恩愛」形容夫妻關係，話係「老夫老妻」，對於唔戴婚戒示人就話向來都唔戴。
Yoyo近年喺社交平台post相都係單頭相居多，夫妻放閃近乎0，而且帖文用字成日流露自立自強正能量，難免惹來遐想。
王浩信買樓俾阿媽先 緋聞當笑話
至於王浩信例牌否認緋聞，仲話兩公婆當呢啲新聞係笑話，又自言夫妻關係因為溝通多咗而越來越清晰。但係當時有報導話，曾經應承買獨立屋俾老婆做禮物嘅王浩信，2018年5月以3306萬買清水灣名人屋苑傲瀧一單位，不過係送俾阿媽，冇寫Yoyo名，據講係唔想他日要分身家。王浩信聲稱已經同老婆商量好先咁做，而Yoyo就話相信對方應承咗嘅嘢一定會做。
按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！
