葡萄友：唔抵得麥明詩？林作專欄酸到爆

麥明詩嗰位唔知仲係咪男友嘅林作原本正識為執業大律師，但最近竟然主動放棄呢個尊貴職業，頻頻出現喺公眾活動，尤如藝人一樣，出書教人追女仔，仲入埋影壇拍攝處男新戲。近日仲公布埋會簽約補習社10年教書，行事都果然令人嘖嘖稱奇。所謂人各有志，唔應該去評論人哋嘅選擇，不過今日要講嘅係林作最近就前女友麥明詩嘅一篇FB文發表「反擊」！

話說麥明詩就七警打人入獄一事於FB撰文，籲大家要尊法治，惹得無數人稱讚轉戴，一時之間人氣無出其右，唔少人仲話「從今日起，支持麥明詩！」可能林作有感風頭被前女友蓋過，竟然喺報章專欄中撰文，話要以事論事，內容大概都係批評麥明詩欠缺律師專業嘅視野，更明言話社會大眾係因為麥明詩「劍橋法律系」呢個頭銜，覺得「講幾句Make sense的話，就能頓時給人聖人的感覺。」字內行間充滿酸味。其實林兄，作為人前男友，何不大大方方祝賀人哋，而要喺身邊酸言酸語呢？做男人，最緊要大方，尤其係對前女友呀。

展現成熟
大方嘅男人識大體，懂尊重人，可以顧全大局，唔會因為眼前一刻嘅感受或者快感去講出傷害人嘅說話，幾時畀人嘅感覺都係成熟老練，可以擔當大場面，令人感覺放心；相反，小器男人感覺小家，難以放心做大事。

紳士風度
就算係咪前女友，男人基本風度就係照顧女士，更莫講話要同女士鬥嘴，其實男士心胸狹窄與否，只要睇佢會唔會介意同女士比較就知，好似林作一樣覺得麥明詩搶咗風頭，計較舊情人活得比自己好，絕對有欠紳士風度啦。

單單打打唔得體
唔係話做男人咩都要硬食，其實遇到不平事或者大是大非面前理應出聲，不過就算真係要同女性據理力爭，都一定要「爭得好體」，所謂君子之爭不出惡言，只須陳述事實就可以，何必單單打打話人「膚淺的群眾都會當你是才子／才女」呢？