葡萄友：香港究竟有幾多會考分數個位數嘅老師

葡萄友

香港嘅教育制度就出名強差人意，只重視成績，唔重視學童身心發展，填鴨式教鬧足幾十年似乎都無甚起色。教育制度差，師資同樣係一大問題，除咗同工不同酬，舊制公務員位教師基本上唔使憂慢慢做，反而新人多數只能用合約制，逐年逐年簽，要負責教書、文書等萬千種工作，仲要朝不保夕，唔知幾時轉到長工，仲點全心全意去教書？另外，教師嘅質素本身亦有好大疑問。

近日FB群組「教師心聲」就有一個引起大眾關注嘅Post，就係樓主話自己雖然會考得4分，但由於有兩個碩士，因此目前做緊班主任。其後亦有人再話自己會考3分，但畀人話無資格教書，覺得好憤怒咁話。（詳見下圖）結果引嚟好兩極反應，有人撐話有教育理想就無問題，最緊要取得晒一切所需嘅教育文憑，就可以教好書，甚至有人話「讀書唔叻嘅老師先了解差嘅學生」等等。當然，似乎反對嘅人佔大多數，點解？睇下以下原因同唔同意？

專業資格
教師係專業職業，有專業牌照，唔同一般嘅Office工，好多人會話出嚟做嘢唔睇成績，係睇你叻唔叻，啱；不過專業職業又係另一回事，專業就必須有一定成績支持，先可以予人信心。你個仔女嘅班主任會考得3、4分，你有咩感受？

唔識考試
公開會考得幾分，你可以話分數唔代表一切，亦唔代表你本人能力，但可以代表到嘅係「你唔識考試囉」，而偏偏就係呢位唔識考試嘅仁兄仁姐，教下一代學生如何考試，你係細路嘅家長的話，我真係恭喜你呀。

假學歷氾濫
好似樓主呢班人，個個會考得幾分，但就擁有Master學位，點解？9成係會考衰咗就去外國讀書，有錢有大學讀有Master讀，外國大量「野雞大學」，加埋近年一眾假學歷新聞嘅事件，更令人懷疑「會考幾分嘅Master」係點讀返嚟？